नेवाः स्कूल व एसएलसी परिक्षा

सम्पादकजु,

नेवाः भासं ब्वंकीगु नेपाःया दकलय् न्हापांगु स्कूल जगत सुन्दर ब्वनेकुथिया सकल ब्वनामि थुगुसी एसएलसी जाँचय् विशिष्ट व प्रथम श्रेणीइ पास जूगु दु । शिक्षाय् मातृभाषाया प्रयोग अति आवश्यक व व्यवहारिक जू धइगु खँ जगत सुन्दर ब्वनेकुथिया एसएलसी नतिजां क्यना बिउगु दु ।

विभिन्न भ्रम व ग्याःचिकुया कारणं नेपाःया स्कूलय् खँय्भाय् बाहेक मेमेगु मातृभाषायात उलि थाय् बियातःगु खने मदु । तर नेपालभाषा माध्यम स्कूलया शतप्रतिशत विद्यार्थीत एसएलसीइ बांलाःगु श्रेणीइ पास जूगुलिं नेवाःत जक मखु सकल नेपाःमिया निंतिं गौरवया खँ जुया बिउगु दु । नेवाः स्कूलय् ब्वंपिं मस्त नेवाः भाय् जक मखु मेमेगु विषयय् नं बांलाः धइगु यथार्थ नं थुगु नतिजां प्रमाणित याना बिउगु दु ।

नेवाः भाय् म्वाक तयेया निंतिं स्कूलय् नेपालभाषा ब्वंकेगु अति आवश्यक जू । जगत सुन्दर ब्वनेकुथिया सफलतापाखें हौसला कयाः नेवाःतय्सं चायेका तःगु मेमेगु स्कूलय् नं नेपालभाषा छगू विषय ब्वंकेगु ज्याया थालनी यायेफत धाःसा नेपालभाषाया संरक्षणय् तःधंगु तिबः जू वनी ।

एसएलसीया सफलताया निंतिं जगत सुन्दर ब्वनेकुथिया सकल जः व पास जूपिं विद्यार्थीपिंत भितुंना लिसें उज्ज्वल भविष्यया कामना यानाच्वना ।

- दिपक तुलाधर, दरबार मार्ग येँ ।

More Stories Like this

केन्द्रया अनुमति कयाः आर्थिक ज्या जुइ मखु
प्वंकेमखंगु श्रद्धांजिल
सुवर्ण शाक्य कि सुवर्णकेशरी ?
लाःलाःथें भाःथकाये मजिल
बांलाःगु सुझावयात सुभाय्