सहमति कार्यान्वयन जुइ ला ?
येँ / (सन्ध्या टाइम्स) सरकार व माओवादी दथुइ जूगु प्यंगू बुँदाया सहमति कार्यान्वयन मजुइगु आशंका सम्बन्धित विज्ञतय्सं याःगु दु । 'सेनापति प्रकरणय् राष्ट्रपितं ल्ह्वंगु पलाःयात कयाः ब्वलंगु मतभिन्नताया बारे दलतय् दथुइ आवश्यक सहलह यानाः लछिया दुने सहमति कायम यायेगु कुतः यायेगु जुइ' धकाः न्ह्यथना तःगु बुँदाया कारणं थज्याःगु आशंका ब्वलंगु खँ सम्बन्धित विज्ञतय्सं धाःगु दु ।
माओवादीं सेनापति प्रकरणय् राष्ट्रपतिया पलाःयात असंवैधानिक धया वयाच्वंगु तर सत्तारुढ दलतय्सं संवैधानिक धयाच्वंगु इलय् सहमति जुइगु खँय् विज्ञतय्सं आशंका प्वंकूगु खः ।
उखे एमालेया सचिव युवराज ज्ञवालीं धाःसा थ्व सम्बन्धय् संसदय् सहलह जुल धाःसा निकास पिहां वइगु आशा प्वंकादीगु दु ।
उखे नेकां महामन्त्री विमलेन्द्र निधिं धाःसा उगु प्यंगू बुँदाया सहमति बारे संसदय् सहलह यायेगु धकाः न्ह्यथना मतःगुलिं सदनय् थ्व बारे सहलह जुइगु सम्भावना मदु धासें उकिया निंतिं न्हापां दलतय् दथुइ निं सहलह जुइमाःगु खँ कनादीगु दु । यदि लछिया दुने नं सहमति जुइ मफुत धाःसा बजेट अधिवेशन नं प्रभावित जुइगु आशंका नं विज्ञतय्सं याःगु दु । निगुलिं पक्षयात मिछंगु अवस्था वःगुलिं जक थुगु सहमति जूगु धापू विज्ञतय् दु ।
