नेवाः सरोकारयात कयाः यलय् प्रशिक्षण
यल (सन्ध्या टाइम्स) / मन्तुना मिसा खलः व नेवाः मिसा गुथि नेपाल मण्डल यल लागाया मंकाः ग्वसालय् 'संघीय लोकतान्त्रिक गणतन्त्र नेपालय् झीगु सरोकार व भूमिका' विषय ज्याझ्वः क्वचाल ।
मंकाः ग्वसाः खलःया निकं मय्जु सुशिला शाक्यया सभापतित्वय् ज्याझ्वलय् नेवाः देय् गुथि नेपालमण्डलया नायः नरेन्द्र भक्त हाडां 'नेवाः स्वायत्त राज्य व नेपालमण्डलया लागा'या बारे कनादीगु खःसा नेवाः देय् दबूया नायः नरेश ताम्राकारं 'काठमाडौं शहरी विकास विधेयक झीगु सरोकार' बारे ध्वाथुइकादीगु खः ।
ललितपुर नागरिक अभियानया शाक्य सुरेनं 'नेवाः स्वशासनया आवश्यकता' बारे ध्वाथुइकादीगु खःसा लोकतान्त्रिक नेवाः मिसा संघर्ष समितिया नकिं डा. चुन्दा बज्राचार्यं 'थौंया नेपालय् मिसातय्गु समानुपातिक समावेशी आवश्यकता व प्रक्रिया' बारे कनादिल । ज्याझ्वलय् लुमन्तिया निर्देशक लजना मानन्धरं स्थानीयस्तरं मिसातय्त सशक्तीकरण यानाः क्षेत्रीय व केन्द्रीय स्तरय् मिसातय्सं क्यनेमाःगु सरोकारयात कयाः ध्वाथुइकादीगु खः ।
नेवाः मिसा गुथि यलया न्वकू मय्जु चमेली शाक्यं लसकुस यानाः न्ह्याःगु उगु ज्याझ्वलय् झिंखुगू मिसा खलः पुचःया पदाधिकारीपिं लगायत थीथी थासं वःपिं सहभागीतय्सं ब्वति काःगु खः ।
अथे हे मन्तुना मिसा खलःया हे ग्वसालय् न्हय्न्हुयंकया लैंगिक समानता व सशक्तीकरण तालिम नं क्वचाःगु दु ।
वंगु असार १२ गते न्ह्याःगु तालिमय् यलया १६ गू मिसा खलः पुचःया ५० म्ह मिसा पदाधिकारीपिंसं ब्वति काःगु खः । तालिम यल उपमहानगरपालिकाया ग्वाहालिइ न्ह्याःगु खः ।
