बजेट असार २९ गते
यें (सन्ध्या टाइम्स) / झण्डै निलां मल्याक ताःहाकःगु अवरुद्ध संसद सुचारु जुइवं आर्थिक दँया वजेट नं वइगु जूगु दु । ततःधंगु स्वंगू राजनीतिक दल दथुइ प्यंगू बुँदाय् सहमति जुइवं अवरुद्ध संसद नं सुचारु जूगु दुसा थुगु दँया वजेट थ्व हे वइगु असार २९ गते सोमवाः वइगु जूगु दु ।
संसद सुचारु यायेगु सहमति जुइवं वजेट न्ह्यब्वयेगु दिं नं क्वःछिउगु खँ अर्थमन्त्री सुरेन्द्र पाण्डें बियादीगु दु । थुकिया निंतिं विज्ञतय्गु छगू पुचः वजेटयात अन्तिम रुप बीगु तयारीइ लगे जूगु दु ।
वजेट पेश यायेगु निंतिं कन्हसं निसें बर्खाया अधिवेशन नं न्ह्यायेत्यंगु दु । संयुक्त सरकार जूगुलिं आः वइगु वजेट सहमतिया दस्तावेजया रुपय् वइगु नं अर्थमन्त्री पाण्डें जानकारी बियादीगु दु ।
थुगुसीया वजेटं सकलें लाभान्वित जुइफयेमा धइगु ल्याखं बांबांलाःगु ज्यायात निरन्तरता बीगु जुइ मन्त्री पाण्डे कनादीगु दु ।
संसद अवरुद्धया कारणं वजेटया बारे सरकार अलमल जुयाच्वंगु खःसां अर्थ विज्ञ व मन्त्रालयया अधिकारीत धाःसा वजटे निर्माणय् व्यस्त जुयाच्वंगु नं सीदुगु दु ।
थुगुसीया वजेटया विशेषता मध्ये युवा स्वरोजगार अन्तर्गत माक्व तालिम बियाः उद्यमी दयेकेगु नापं बैंकं त्यासा बियाः उद्यम याये चाहे जूपिनिगु निंतिं ज्या सुनिश्चित जुइकथंया ज्याझ्वःत हयेगु जुइ मन्त्री पाण्डें धयादीगु दु ।
अथे हे स्वदँया दुने सकसितं शिक्षा बीगु उद्देश्यं सार्वजनिक विद्यालय संचालनया निंतिं स्थानीय विकास मन्त्रालयपाखें खर्च यायेगु कथं १ अर्ब ४ करोडया वजेट विनियोजन यानागु खःसां थुकिया जिम्मेवारी सुनां नं काये चाहे मजूगु खँ छम्ह विज्ञ कनादीगु दु ।
