झाडाबान्तां झिद्वः प्रभावित
यें (सन्ध्या टाइम्स) / नेपाःया पश्चिमी पहाडी जिल्ला जाजकोटय् न्यनावंगु झाडाबान्ताया प्रकोपं झिद्वलं मल्याक मनू प्रभावित जूगु दु ।
जाजरकोटं ब्वलंगु उगु झाडाबान्ताया प्रकोप आः जःखः च्वंगु सल्यान रुकुम दैलेख व सुर्खेत नापं पहाडी लागाय् नं न्यना वनाच्वंगु दु ।
झाडाबान्तां यानाः जाजरकोटय् जक ६५ म्ह मनू सीधुंकूगु दु । थौं सुथय् जाजरकोटय् निम्ह थप सीगु दु । स्थानीय वासिन्दातय् कथं थ्व ल्याः अझ अप्वयेफु ।
ताः ई न्ह्यवंनिसें झाडाबान्ताया महामारी न्यनाः अन वासः तकं अभाव जुयाच्वंगु दु ।
सामान्य वासःया अभाव जुलं तकं सरकारं चिउताः मतः धासें स्थानीय वासिन्दातय्सं आक्रोस प्वंकूगु दु ।
सरकारं थज्याःगु महामारीया इलय् नं थःपिंत वास्ता मयाःगु द्वपं नं स्थानीय जनतां बिया च्वंगु दु ।
उखे जाजरकोटया प्रमुख जिल्ला अधिकारी रॆशम बहादुर पाण्डें थम्हं आवश्यक वासःया निंतिं सरकारयात जानकारी बी धुनागु खँ धाःगु दु ।
वय्कलं चिकित्सक व वासः छ्वयेगु तयारी याना- च्वनागु खँ कनादीगु दु । तर स्थानीय वासिन्दात धाःसा थ्व खँय् विश्वस्त जुइ फयाच्वंगु मदु ।
