खुलाया दुने शान्ति प्रकि्रया निष्कर्षय्
यें (सन्ध्या टाइम्स) / खुलाया दुने शान्ति प्रक्रिया तार्किक निष्कर्षय् थ्यनीगु खँ प्रधानमन्त्री माधव नेपालं धयादीगु दु ।
थौं सुथय् संयुक्त राष्ट्रसंघीय अनमिन प्रमुख करिन लैन्डग्रीनयात नापलायेगु झ्वलय् वय्कलं उगु बिचाः प्वंकादीगु खः ।
सेना समायोजन सम्बन्धी समितिं थःपिनि ज्या न्ह्याकेधुंकूगुलिं स्वलांनिसें खुलाया दुने माओवादी जनसेना समायोजन प्रक्रिया पूवनीगु खँ नं प्रम नेपालं लैन्डग्रीनयात कनादीगु दु ।
नेपाःया राजनीति पाय्छिगु लँय् वनाच्वंगु खँ कनादिसें वय्कलं दलतय् दथुइ ब्वलनाच्वंगु राजनीतिक असन्तुष्टि क्वचाःगु खँ नं कनादीगु दु ।
प्रम नापलायेगु झ्वलय् अनमिन प्रमुख लैन्डग्रीनं नेपाःया राजनीतिक अवस्था सेना समायोजन व शान्ति प्रक्रिया बारे थःगु चिउताः प्वंकादीगु खः ।
अनमिन प्रमुख लैन्डग्रीन कन्हय् संयुक्त राष्ट्रसंघया महासभाय् ब्वति कायेत न्युयोर्क वनेत्यंगु दु ।
