ज्याथाय् ४० लाख लुटे यात
यें (सन्ध्या टाइम्स) / थनया ज्याथाय् थौं सुथय् ११ बजे खुल्ला लँय् हे छम्ह मनूयात पेस्तोल क्यनाः वं ज्वना वःगु करिब ४० लाख तका दां लुटे यानाः यंकूगु दु ।
ठमेलया पोटाला गेष्ट हाउसं ध्यबा ज्वनाः स्कूटर गयाः वनाच्वंम्ह स्वयम्भु विजेश्वरीया सामदोर्जे लामायात ज्याथाय् मोटरसाइकल हे गया वःपिं निम्ह मनूतय्सं उकथं लुटे याःगु खः । लामा गलैंचा निर्यातया ज्या याइम्ह खः । वं ज्वना वःगु ब्यागय् ३० लाख ८० हजार तका दां दुगु खँ वं प्रहरीयात धाःगु दु ।
ज्याथाया मोडय् लाक्क थ्यंबलय् मोटरसाइकल गया वःपिं निम्ह लुटेरातय्सं वयागु स्कूटरयात दिकाः पेस्तोल क्यनाः वयात लुटे याःगु खः । वयात लुटे यायेधुंकाःलि लुटेरातय्त स्थानीय मनूतय्सं छुं ई लिना नं यंकूगु खः । तर लिउ वःपिंत उमिसं पेस्तोल ताके यानाः कयेके थें याःगुलिं सुनां नं ज्वने मफुगु खः । लुमंकेबह जू वंगु लछि ति न्ह्यः नं पोताला गेष्टहाउसं हे पिहां वःम्ह छम्ह मनूयात बुरांख्यलय् पेस्तोल क्यनाः लुटे याःगु खः ।
