पेट्रोलया भाः थकायेगु तयारी
येँ / (सन्ध्या टाइम्स) नेपाल आयल निगमं पेट्रोलियम पदार्थया भाः थकायेगु गृहकार्य शुरु याःगु खँ सूत्रं धाःगु दु ।
सूत्रया कथं भारतय् पेट्रोलियम पदार्थया भाः थहां वनेवं नेपालय् नं पेट्रोलियम पदार्थया नं लागत थहां वनीगु जूगुलिं भाः थकायेगु तयारी निगमं याःगु खः । लिसें भारतया पेट्रोलियम कम्पनी आइओसीयात ध्यबा पुलेगु लागिं नं निगमं भाः थकायेत्यंगु खः ।
अन्तर्राष्ट्रिय बजारय् पेट्रोलियम पदार्थया भाः थहां वंगु इलय् निगमं आइओसीयात पुलेमानिगु ११ अर्ब २० करोड तका दां मुंकेगु निंतिं नं भाः थकायेगु कुतः यानाच्वंगु खँ सीदुगु दु ।
निगमं उपभोक्तायात मार मलाइ कथं भाः थकायेगु कुतः यानाच्वंगु दु । तर थ्व सम्बन्धय् निगमया प्रवक्ता मुकुन्दप्रसाद ढुंगेलयात स्वापू तयाबलय् वय्कलं धाःसा आः थत्थें भाः थकायेगु योजना मदुगु खँ कनादिल । निगमयात प्रति लिटर डिजेलय् २/२३ तका घाटा जुयाच्वंगु दुसां मेमेगु पदार्थय् धाःसा लबः हे दु ।
