दलाई लामाया बुन्हि
येँ / (सन्ध्या टाइम्स) तिब्बती धार्मिक नेता दलाई लामाया थौं बुन्हि कुन्हु येँया थीथी थासय् तिब्बती शरणार्थीतय्सं चीन विरोधी गतिविधि याये फइगु सम्भावनायात ध्यानतय् तयाः सरकारं सुरक्षा व्यवस्था कडा याःगु दु ।
सरकारं चिनियाँ राजदूतावास काउन्सिलरया ज्याकुथी कडा सुरक्षा व्यवस्था याःगु दुसा तिब्बती शरणार्थी च्वनाच्वंगु थासय् नं सुरक्षा कडा याःगु दु ।
प्रहरीं थनया बौद्ध यलया एकान्तकुना लगायत थीथी थासय् कडा निगरानी यानाच्वंगु दु । अथे हे तिब्बती शरणार्थीत दये फइगु थीथी थासय् नं निगरानी तयाच्वंगु खँ धाःगु दु ।
थ्वहे झ्वलय् प्रहरीं स्वय्म्भू जःखः च्वंगु लागाय् नं सुरक्षा व्यवस्था कडा यानातःगु दु । वंगु छुं न्हि न्ह्यः नेपाःया छुं सभासद्तय्सं भारतय् वनाः दलाई लामायात नापलाःगु खःसा वयां लिपा हे नेपालय् तिब्बती शरणार्थीतय् सकि्रयता अप्वःगु खः । थ्व खँय् चीनं नेपाःया समक्ष असन्तुष्टि प्वंकाच्वंगु दु ।
