कोशी कटान जारी
येँ / (सन्ध्या टाइम्स) पूर्वी नेपालय् निरन्तर रुपं वयाच्वंगु वाया कारणं कोशी बाँधया स्पर दुनीगु खतरा अप्वया वनाच्वंगु खँ प्राविधिकतय्सं धाःगु दु ।
निरन्तर रुपं वा वयेवं पश्चिमपाखे बाः वनाच्वंगु खुसिं पूर्वीपाखे बाः वनाः स्पर कटान यानाच्वंगु खँ धाःगु दु ।
तर कटान जूसां वंगु दँय् थें खुसि गामय् दुहां मवइगु खँ अनया छम्ह इन्जिनियरं धाःगु दु । स्वन्हु न्ह्यः तक कोशीइ १ लाख ९१ हजार क्युसेक लः थ्यंगु खःसा आइतबाः म्हो जुयाः ९१ क्युसेकय् कुहां वःगु दु ।
कोशीइ लः बिसें नं फिया मात्रा अप्वयाः गां स्वयां नं खुसिया जाः थहां वयाच्वंगुलिं अन निरन्तर रुपं भारतीय व नेपाली प्राविधिकतय्सं निरीक्षण यानाच्वंगु दु । अन स्वयाच्वंपिं प्राविधिकतय्सं थथें कोशी बाः वइगु खतरा मदु धयाच्वंगु दु ।
तर प्राविधिकतय्सं कोशीं आः नोक्सानी याइ मखु धाःसां नं स्थानीय वासिन्दातय्सं धाःसा अझ नं उकियात विश्वास याये फयाच्वंगु मदुनि ।
थगुने कोशीइ वःगु खुसिबालं यानाः ४२ द्वः स्थानीय वासिन्दा विस्थापित जूगु खः । थगुने विस्थापित जूपिं आः तक नं थःगु थासय् लिहां वने फयाच्वंगु मदुसा उमित सरकारं बी धाःगु क्षतिपूर्ति नं आः तक मबिउनि ।
