संसद गतिरोध अन्त्य यायेगु सहमित
संसदय् प्रधानमन्त्री नेपाल व माओवादी अध्यक्ष प्रचण्डं सम्वोधन याइगु
ताः ई न्ह्यः निसें राष्ट्रपितं प्रधानसेनापतियात पदय् पुर्नबहाली यायेत ल्ह्वंगु पला असंवैधानिक जूगु व नागरिक सर्वोच्चताया निंतिं धकाः आन्दोलन याना:वयाच्वंगु एकीकृत नेकपा (माओवादी) संसद सुचारु यायेत सहमत जूगु दु ।
सोमवाः सत्तारुढ नेकपा (एमाले), नेपाली कांग्रेस व प्रमुख प्रतिपक्ष एकीकृत नेकपा (माओवादी) दथुइ जूगु सहलहलय् थ्व सहमति जूगु खः । सहलहस माओवादी ल्ह्वंगु नागरिक सर्वोच्चता लगायतया मागत मेमेगू दलनाप सहलह यानाः निर्णय यायेगु सहमति जुइवं माओवादीं संसद न्ह्याकेबीगु जूगु खः । माओवादीं नागरिक सर्वोच्चताया बारे निर्णय यायेत सरकारयात लच्छिया ई ब्यूगु दु । बैठक लिपाः माओवादी नेता नारायणकाजी श्रेष्ठं माओवादीं ल्ह्वंगु मागत दुथ्याकाः प्रधानमन्त्रीं संसदय् सम्वोधन यायेगु सहमति जूगु धयादिल ।
अथेहे सोमवाः हे कांग्रेस सभापति व माओवादीया नेतात दथुइ जूगु सहलह लिपा माओवादी अध्यक्ष पुष्पकमल दाहाल 'प्रचण्डं' सोमवाः निसें संसदय् अवरोध मयायेगु खँ धयादीगु खः । अथेहे कांग्रेस नेता कृष्ण प्रसाद सिटौलां निती तथा ज्याझ्वः सहित माओवादीं संसद सुचारु यायेबीगु सहमति जूगु जानकारी बियादीगु ख: ।
कांग्रेस सभापति कोइराला नाप जूगु सहलह सकारात्म जूगु खँ निगूलिं दलया नेतातय्सं धाःगु खः । बैठकय् प्रधानमन्त्री माधवकुमार नेपाल व माओवादी अध्यक्ष प्रचण्डं सम्वोधन याइगु खँ क्वछीगु दु । बैठकय् कांग्रेसं संसदय् प्रधानमन्त्रीं याइगु सम्वोधन माओवादीया माग कथं यायेत सहमति प्वंकूगु खः ।
अथेहे माओवादीया सोमवाः सुथय् च्वंगु सचिवालयया बैठकं संसदय् अवरोध मयायेगु निर्णय याःगु खः । बैठकं देशय् संकट वयेमबीगु निंतिं पेश्की बजेटया निंतिं जुसां संसद न्ह्याकेबीगु निर्णय याःगु खः । माओवादी प्रवत्ता दिनानाथ शर्माया कथं कांग्रेस व एमाले नाप सहमति जुसा: नीति व ज्याझ्वः नं प्रेश यायेत राष्ट्रपतियात छुं नं कथंया अवरोध मयायेगु जानकारी बियादीगु खः ।
