बसन्तपुली सुथय् नसंचा
येँ (सन्ध्या टाइम्स) / नेपालभाषा जक मखु नेपाःया हे न्हापांम्ह मिसा बाखं च्वमि मोतिलक्ष्मी उपासिकाया सछिदँ बुन्हिया लसताय् म्हिगः सुथय् येँया बसन्तपुलिं छगू नसंचा उलेगु ज्या जुल ।
मोतिलक्ष्मी उपासिका सछिदँ बुन्हि ग्वसाः खलःपाखें याःगु उगु ज्याझ्वलय् नेपालभाषाया आपालं साहित्यकार पत्रकार नापं भाषिक कार्यकर्तातय्सं ब्वति काःगु खः ।
ग्वसाः खलःया नायः एवं नेपालभाषा परिषद्या अध्यक्ष फणीन्द्र रत्न वज्राचार्य नापं नेपालभाषा मिसा खलःया नकिं मंगला कारंजित पुलांम्ह नकिं सुवर्णकेशरी चित्रकार आदि साहित्यकारपिनिगु उपस्थितिइ दुगु खः ।
नसंचा उलेगु उगु हे ज्याझ्वलय् पुलांम्ह मंत्री हिसिला यमि नं उपस्थित जुयादीगु खः । नाता कथं मय्जु यमि मोतिलक्ष्मीया भिंचा खः ।
नसंचाय् ब्वति काः वःपिं कार्यकर्तातय्सं मोतिलक्ष्मीया किपा दुगु बोर्ड नापं थीथी नारा च्वयातःगु प्लेकार्ड व ब्यानर आदि नं ब्वयाः वःगु खः । नसंचाय् नेपालभाषा कार्यकर्ता नापं थीथी स्कूलया मस्तय्सं नं ब्वति काःगु खः ।
बसन्तपुलिं शुरु जूगु उगु नसंचा र् याली कुमारी चाःहीकीगु येँया थःने क्वःने लागा चाःहिलाःलि जनबाहाःद्यः जुयाः किलागलं न्यत तुंछेँय् मोतिलक्ष्मी एवं चित्तधर 'ह्दय'या छेँय् थ्यंकाः समापन याःगु खः ।
ज्याझ्वःया अन्त्यय् अन छेँय् तयातःगु मोतिलक्ष्मीया किपाय् नेपालभाषाया थीथी साहित्यकारपिंसं स्वां देछाःगु खः । मोतिलक्ष्मी व चित्तधर जन्म जूगु उगु छेँयात आः न्हूधाः यानाः याकनं हे संग्रहालय दयेकेगु तयारी जुयाच्वंगु दु ।
नेपालभाषा जक मखु नेपालय् हे सुं नं मिसा साहित्यकारया नामय् थथे नसंचा उलेगु ज्या जूगु थ्वहे न्हापांखुसी खः धाःगु दु । मोतिलक्ष्मीया सछिदँ बुन्हि हनेत ताः ई न्ह्यवंनिसें तयारी जुया वयाच्वंगु खः ।
