मोतिलक्ष्मीया झःझः धाःगु सछिदँ
सछिप्वाः देवा च्याकाः सछिदँ
येँ (सन्ध्या टाइम्स) / नेपाःया हे न्हापांम्ह मिसा बाखं च्वमि मय्जु मोतिलक्ष्मी उपासिकाया सछिदँ बुन्हिया लसताय् म्हिगः थनया परोपकार उमाविइ छगू विशेष ज्याझ्वः जुल । ज्याझ्वलय् न्ववानादीपिं थीथी वक्तातय्सं मदुम्ह मोतिलक्ष्मीया साहित्य समाजसेवा बुद्ध धर्मया सेवा आदि थीथी ख्यलय् दुगु योगदानयात कयाः चर्चा यानादीगु खः ।
ज्याझ्वलय् नेपालभाषा एकेदमिय चान्सलर सत्यमोहन जोशीं 'नेपाल' ऋतुपौया मोतिलक्ष्मी उपासिका विशेष ल्याः विमोचन यानादिल । अथे हे ज्याथम्ह बाखं च्वमि माधवलाल कर्माचार्यं मोतिलक्ष्मीया किपा तयाः पिहां वःगु वहःया पाँय्म्वह विमोचन यानादिल ।
उगु ज्याझ्वलय् मू पाहां कथं नेपालभाषाया कवयित्री नारायणदेवी श्रेष्ठ झाःगु खः । वय्कलं थुगु दँया मोतिलक्ष्मी सिरपाः मय्जु नानीमैंया मानन्धरयात लःल्हानादिल । मय्जु मानन्धरं नेपालभाषा साहित्य अनुवाद आदि ख्यलय् यानादीगु योगदानय कदर यासें झिंन्याद्वः तकाया उगु सिरपाः लःल्हायेगु निर्णय जूगु खः । उगु सिरपाः नेपालभाषा परिषदं बीगु खः ।
मोतिलक्ष्मी उपासिका सछिदँ बुन्हि ग्वसाः खलःया नायः फणीन्द्ररत्न वज्राचार्यया सभापतित्वय् जूगु उगु ज्याझ्वलय् नेवाःतय् राष्ट्रिय संगठन नेवाः देय् दबूया प्रतिनिधि कथं मय्जु धर्मशोभा तुलाधरं न्ववानादीगु खःसा मोतिलक्ष्मीया सतीम्ह छेँजःपाखें डा. केशरीलक्ष्मी मानन्धरं छपु कविता न्यंकादिसें मोतिलक्ष्मी सम्बन्धी थःगु भावना प्वंकादीगु खः ।
ज्याझ्वलय् नेपालभाषा मिसा खलःया नकिं मंगला कारंजित सकसितं लसकुस यानदीगु खःसा मिसा खलःया पुलांम्ह निकं सुवर्णकेशरी चित्रकारं सुभाय् देछानादीगु खः । मय्जु मोतिलक्ष्मी नेपालभाषा मिसा खलःया संस्थापक नकिं खः ।
सछिदँय् क्यंम्ह मदुम्ह मोतिलक्ष्मीया लुमंतिइ सछिप्वाः हे देवा च्याकाः उगु ज्याझ्वःया उलेज्या याःगु खः । ज्याझ्वलय् नेपालभाषा ख्यःया आपालं साहित्यकार व भाषासेवीपिनि उपस्थिति दुगु खः ।
