समायोजन यायेत आलटाल यासाः विद्रोह : माओवादी कमाण्डर
समायोजन लिपाः धासाः माओवादीया घोषित ज्याझ्वःयात साथ बीमफइगु
एकीकृत नेकपा (माओवादी) सेनाया छम्ह कमाण्डरं सरकारं सेना समायोजनय् आलटाल यासाः विद्रोह यायेगु ख्याच्वः ब्यूगु दु । सुर्खेतया दशरथपुरय् च्वंगु माओवादी सेनाया खुगूगु डिभिजन कमाण्डर महेन्द्र शाहीं सेना समायोजनय् सरकारं ईलय् हे ध्यान मब्यूसाः विद्रोह यायेगु ख्याच्वः ब्यूगु खः ।
सोमवाः वीरेन्द्रनगरय् क्रान्तिकारी पत्रकार सघं याःगु पत्रकार नापलायेगु ज्याझ्वलय् शाहीं माओवादी सेनाया आडय् राजनीतिक दलत सत्ताय् थ्यंसां थःपिनिगु योगदानया अवमूल्यन याःगु दाबी यानादिल । वयेकलं आः देशय् जिम्मेवार दलत हे सेना समायोजनया विपक्षय् खनेदुगु धासें यदि थथेहे खसाः माओवादीं याइगु जनविद्रोहयात साथ बीगु धयादिल ।
छगू देशय् निथि सेना दुतल्ले शान्ति प्रकृया निष्कर्षय् मथ्यनीगु धासें वयेकलं सेना समायोजन आःया प्रमुख आवश्यकता जूगु धयादिल । वयेकलं थःपिं सरकार मातहत जुसां राष्ट्रिय सेना मजूगुलिं राजनीतिक ज्याझ्वलय् ब्वति जुइगु यानाच्वंगु धासें सेना समायोजन जुइधुंकाः थःपिसं सरकारया आदेश पालना यायेगु धयादिल । वयेकलं समायोजन लिपाः धासाः माओवादीया घोषित ज्याझ्वःयात साथ बीमफइगु स्पष्ट यानादिल ।
