येँया क्याम्पस न्ह्यने न्हिच्छि प्रदर्शन

येँया त्रिचन्द्र क्याम्पसय् आइतवाः टेन्डर सम्बन्धि विवाद अप्वयेवं जूगु भिडन्तय् गोली प्रहार जूगु घटनाया विरोधय् नेपाल विद्यार्थी संघं येँया प्रमुख क्याम्पस न्ह्यने सुथंनिसें विरोध प्रदर्शन याःगु दु ।

विद्यार्थीतय् प्रदर्शनया कारणं प्रदर्शनी मार्ग, चाहबहि व घण्टाघर क्षेत्रया सवारी आवगमन सोमवाः न्हिच्छि हे प्रभावित जुल । आइतवाः त्रिचन्द्र क्याम्पसय् टेन्डर विवाद लिपा जूगु झडपया झ्वलय् नेविसंघया दुजः भीमसेन गुरुङयात गोलीं लाःगु खसाः नेविसंघया मेम्ह दुजः रवि थापा रड प्रहारं घाःपाः जूगु खः ।

नेविसंघं एमाले सम्बद्ध अनेरास्ववियुं युथफोस्रया ग्वाहालि उगु आक्रमण याःगु द्वपं ब्यूगु दुसाः अनेरास्ववियुं धाःसा थुकी थःगु संगठनया संलग्नता मदुगु खँ धयाच्वंगु दु ।