तराईया सशस्त्र पुचः सशंकित
येँ (सन्ध्या टाइम्स) / सरकार हिलेवं तराई लागाय् सशस्त्र आन्दोलन याना वयाच्वंगु पुचःतलिसे न्ह्याना- च्वंगु वार्ता नं स्यंगु खँ सम्बन्धित सूत्रं धाःगु दु ।
माओवादी नेतृत्वय् सरकार दुगु इलय् तराई लागाय् आन्दोलन याना वयाच्वंगु थीथी पुचःत लिसे तत्कालिन सरकारं छगू चरणया वार्ता यायेधुंकूगु दुसा मेगु चरणया वार्ताया निंतिं तयारी जुयाच्वंगु खः । तर अबलय् हे माओवादी सरकार क्वःदलेवं उगु पुचःत लिसे जुयाच्वंगु वार्ता नं अन्यौलय् लाः वंगु खँ धाःगु दु ।
वार्ताया सवालय् सरकारी पक्षं ल्हानाच्वंगु थीथी कथंया खं यानाः सशस्त्र पुचःत सशंकित जुयाच्वंगु खँ धाःगु दु ।
सशस्त्र पुचलं सरकारलिसे वार्ता यायेगु इच्छा क्यनाच्वंसां नं आः तक उमिगु चाहना पूवने फयाच्वंगु मदु । उमिसं वार्ताया निंतिं सरकार सकारात्मक मजूगु द्वपं नं बियाच्वंगु दु ।
वार्ताय् वःगु संयुक्त तराई मुक्ति मोर्चाया वार्ता संयोजक साजय गुप्तां सरकार वार्ताया निंतिं सकारात्मक मजूगु द्वपं बिउगु दु ।
वर्तमान सरकारं राजनीतिक उद्देश्यं गठन जूगु पुचतःलिसे जक वार्ता जुइ धायेवं आः थःपिंत गैर राजनीतिक तायेकाः दमन यायेगु नियत सरकारं ज्वन धकाः उपिं सशंकित जुयाच्वंगु खः ।
