एमाले कार्यकर्ता माओवादीइ केन्द्रीय नेतात नं वनीगु
येँ (सन्ध्या टाइम्स) / येँय् सक्रिय जुयाच्वंपिं एमाले व राप्रपाया आपालं कार्यकर्तात थौं मंकाः रुपं माओवादीइ प्रवेश जुइत्यंगु दु । थुकी एमालेया अंचलस्तरीय नेतात समेत दुथ्याःगु खँ धाःगु दु ।
थौं थनया राष्ट्रिय सभागृहय् छगू विशेष ज्याझ्वः यासें थ्व कार्यकर्तायात माओवादी प्रवेश याकेत्यंगु खः । सूत्रं बिउगु जानकारी कथं थौं माओवादी प्रवेश जुइत्यंपिं कार्यकर्तातय् ल्याः द्वःछि स्वयां अप्वः दु ।
थ्वहे झ्वलय् थौं एमाले त्वःताः माओवादी प्रवेश जुइत्यंम्ह धकाः एमालेया केन्द्रीय दुजः राजेन्द्र श्रेष्ठया नां नं चर्चाय् वयाच्वंगु दु । थौं थीथी मनूतय्सं वय्कः नं माओवादी प्रवेश जुइत्यंगु खः ला धकाः छम्हं मेम्हेसिके न्यनेकने यानाच्वंगु सीदुगु दु ।
तर 'सन्ध्या टाइम्सं' थौं वय्कःयात हे स्वापू तयाः थ्व बारे न्यनाबलय् धाःसा वय्कलं थुकिया खण्डन यानादिल । वय्कलं थः एमाले व माओवादी एकीकरण याःसां जिउ धइगु पक्षयाम्ह खःसां एमाले त्वःताः याकःचा माओवादीइ वनेगु थःगु छुं बिचाः मदुगु खँ वय्कलं कनादिल ।
थः याकःचा एमाले त्वःता वन धाःसा अन दुनेया दक्षिणपन्थी शक्तितय्त पार्टी कब्जा यायेत अःपुइ व उकिं वामपन्थी आन्दोलनयात अझ कमजोर याना बी धासें थुकिं यानाः नं थः याकःचा माओवादीइ वनेगु सोच मदुगु खँ वय्कलं कनादिल ।
थौं एमाले कार्यकर्ता चन्द्रप्रकाश बानियाया नेतृत्वय् छपुचः कार्यकर्ता माओवादीइ दुहां वनेत्यंगु खः । माओवादी सूत्रया कथं छुं ई लिपा एमालेया छुं केन्द्रीय नेतात नं पार्टी प्रवेश यायेत्यंगु दु ।
