लडाइ लिप्पांगु चरणय् : प्रचण्ड

एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' थःपिं लडाइया अन्तिम चरणय् थ्यंगु खँ धयादीगु दु ।

थीथी राजनीतिक दलपाखें माओवादीइ प्रवेश याइपिंत लसकुस यायेत नेवाः राज्य समितिं आइतवाः येँय् या:गु ज्याझ्वलय् अध्यक्ष प्रचण्डं थ:पिनि लडाइ मध्यान्तरं न्ह्याः वनेधुंकूगु धासें लडाइ लिप्पांगु चरणय् थ्यंगु व जीत नेपाली जनतया हे जुइगु दाबी यानादिल । वयेकलं राष्ट्रिय स्वतन्त्रता व भौगोलिक अखण्डताया निंतिं बलिदान बीत तयार जूगु धासें देयन्यंक माओवादी पार्टीइ प्रवेश जुइगु लहरं देय् दुन व पिनेयापिं प्रतिक्रियावादीत निराश जूगु धयादिल ।

पुलांम्ह प्रधानमन्त्री नं जुयादिम्ह माओवादी अध्यक्ष प्रचण्डं माओवादी नेतृत्वया राष्ट्रिय सरकार गठन जुयमबीगु षड्यन्त्र जुयाच्वंगु धासें अज्याःगु षड्यन्त्रयात परास्त यायेगु दाबी यानादिल । वयेकलं थंज्याःगु षड्यन्त्रयात परास्त यायेगु व विदेशी प्रभुतय् न्ह्यने माओवादी क्वमछुइगु धयादिल ।

वयेकलं आःया सरकार बूपिनीगु सरकार जूगु टिप्पाणी यानादिसें थुकीं हनिमय् हे अखःगु चमत्कारया नमूना क्यनाब्यूगु धयादिल । वयेकलं माओवादीं सरकार पाखें या:गु राजिनामा क्षेप्यास्त्र सावित जुयावंगु दाबी यासें नेपाली जनतायात हेपे याइपिं सावधान जुइमाः धयादिल ।

ज्याझ्वलय् नेकपा (एमाले), नेपाली कांग्रेस व राष्ट्रिय प्रजातन्त्र पार्टी पाखें एकीकृत नेकपा (माओवादी)लय् प्रवेश यापिं ३५९म्ह नेता तथा कार्यकर्तातय्त अध्यक्ष प्रचण्ड, माओवादी नेतात डा.बाबुराम भट्टराई व नारायणकाजी श्रेष्ठ 'प्रकाशं' अबिर व स्वामा: क्वखायेका लसकुस यानादीगु ख: ।

Share