त्रिचन्द्रय् विद्यार्थीत दथुइ भिडन्त

त्रिचन्द्र कलेजय् टेण्डर सम्बन्धी विवादया कारणं आइतवाः अनेरास्ववियु व नेविसंघया विद्यार्थीत दथुइ झडप जूगु दु । कलेजया रसायन विज्ञान भवनया तला थकायेत क्याम्पसं टेन्डर आव्हान याःगु खसाः थ्वहे टेन्डर दर्ता यायेगु सम्बन्धी विवाद अप्वयेवं झडप जूगु खः ।

झडपया झ्वलय् छुं अज्ञात पुचलं गोली क्येगु ईलय् नेविसंघया केन्द्रीय दुजः भीमसिंह गुरुङ घाःपाः जूगु दु । घाःपाः जुम्ह गुरुङयात आः टिचिङ अस्पतालय् वासः याकातःगु दु । अथेहे नेविसंघया मेम्ह सक्रिय दुजः रवि थापा धासां रड प्रहारं घाःपा जूगु दु । थापायात मेडिकेयर अस्पतालय् वासः याकातःगु दु ।

नेविसंघया अध्यक्ष प्रदीप पौडेलं युथफोस्रया कार्यकर्तातय्सं गोली चलेयाःगु दाबी याःगु दु । तर युथफोस्रया अध्यक्ष महेश बस्नेतं धासाः उगु घटना जूगु ईलय् युथफोस्रया कार्यकर्तात अन मदुगु खँ धाःगु दु ।

अथेहे अनेरास्ववियुं टेन्डर दर्ता यायेगु झ्वलय् नेविसंघं दर्ता यायेत पंगः थनेवं झडपया स्थिति पिहांवःगु खँ धाःगु दु । नेविसंघं थ्वस्वयां न्ह्यः हे थःगु टेन्डर दर्ता यायेधुंकूगु खः ।

झडप लिपा विद्यार्थीतय्सं क्याम्पस प्रमुखया ज्याकू व स्वतन्त्र विद्यार्थी युनियनया ज्याकूथी तोडफोड याःगु दु । अन झडप नियन्त्रण यायेत प्रहरीं प्यंगु राउण्ड हवाय फायर याःगु खः ।

Share