सरकारयात ग्वाहालि मदुगु हल्ला जक : खनाल
नेकपा (एमाले) नेतृत्वया सरकारयात थःगु हे पार्टीया दुजःतय् समर्थन मदुगु धकाः पिहांवःगु खँ हल्ला जक जूगु दाबी एमाले अध्यक्ष झलनाथ खनालं यानादीगु दु ।
एमाले ज्याकू बल्खुइ छगू पत्रकार सम्मेलन यानाः अध्यक्ष खनालं सरकारयात समर्थन मदुगु खँया खण्डन यासें एमालेया दक्वं नेतात छप्पँ जुयाः सरकारयात ग्वाहालि याइगु धयादिल । वयेकलं एकीकृत नेकपा (माओवादीं) याकनं हे एमालेया संस्थापन पक्षनाप मिलेजुया राष्ट्रिय सरकार गठन जुइगु धकाः पिंहावयाच्वंगु खँ नं हल्ला जक जूगु धासें थ्वहे सरकारय् माओवादीयात नं दुथ्याःका राष्ट्रिय सरकार देयेकीगु धयादिल ।
संसद सुचारु यायेत छन्हु-निन्हु दुनेहे 'आइसब्रेक' जुइगु धायादिसें अध्यक्ष खनालं प्रधानमन्त्री माधव नेपालया विकल्प मदु धयादिल । वयेकलं राष्ट्रपतिया पलाः राजनीतिक जूगु व सर्वोच्चय् विचाराधीन विषय जूगुलिं एमालें थुकीया बारे छुं नं निर्णय मयाःगु स्पष्ट यानादिल ।
अथेहे पत्रकार सम्मेलनय् अध्यक्ष खनालं एमालेया केन्द्रीय दुजःत सहित नेतात माओवादीइ प्रवेश जुइगु तयारी जुयाच्वंगु खँ दक्षिणपन्थीतय्सं याःगु हल्ला जक जूगु धयादिल ।
