लचकता क्यनेत एमाले-कांग्रेस तयार / एमाले पाखें माओवादीया प्रस्ताव अस्वीकार
एकीकृत नेकपा (माओवादीं) निरन्तर यानाच्वंगु संसद अवरोध अन्त्य यायेगु बारे सहलह यायेत च्वंगु निगू सत्तारुढ दलया बैठकय् सहमतिया निंतिं लचकता क्यनीगु सहमति जूगु दु ।
सत्तारुढ नेकपा (एमाले) व नेपाली कांग्रेस दथुइ शनिवाः प्रधानमन्त्री निवास बालुवाटारय् जूगु सहलहलय् माओवादी नाप सहमति यायेगु निंतिं सत्ता गठबन्धन नीनिगू दलया सहमतिइ संसद सुचारु यायेत माओवादी नाप लचकताया साथ वार्ता यायेगु क्वछीगु खः ।
थ्वस्वयां न्ह्यः अवरुद्ध व्यवस्थापिका संसद संचालन यायेगु निंतिं सत्तारुढ नेकपा (एमाले) व प्रमुख प्रतिपक्षी एकीकृत नेकपा (माओवादी) दथुइ जूगु सहलह बिना निष्कष क्वचाःगु ख: ।
शनिवः जूगु सहलहस माओवादीं पेश्की बजेट ह्येत जक संसद न्ह्याकेबीगु धकाः तःगु प्रस्ताव एमालें अस्वीकार याःगु दु । सहलहस एमाले नेतातय्सं नीति व ज्याझ्वः प्रस्तुत यायेमब्यूसें पेश्की बजेट जक ह्येबीगुया छुं अर्थ मदइगु खँ धाःगु खः ।
एमाले संसदीय ज्याकू सिंहदरवारय् जूगु सहलहस माओवादीं संविधान संशोधन यानाः राष्ट्रपति व प्रधानमन्त्रीया कार्यक्षेत्र यकिन यायेफुसाः संसद सुचारु यायेबीगु खँ तःगु खः । बैठक लिपाः माओवादी अध्यक्ष पुष्पकमल दाहाल 'प्रचण्डं' वार्ता सकारात्मक जुसां 'आइसब्रेक' जुइ धाःसाः ल्यंदनी धयादिल । वयेकलं माओवादीं ल्ह्वंगु मागत दुथ्याकाः प्रधानमन्त्रीं संसदय् संवोधन यासाः 'आइसब्रेक' जुइ धयादिल । अथेहे प्रधानमन्त्रीया राजनीतिक सल्लहाकार रद्युजी पन्तं संविधान संशोधन यायेमफइगु व राष्ट्रपतिया पलाः नं भिंकेमफइगु जुसां बैठक सकारात्मक जूगु धयादिल ।
सहमतिया निंतिं एमाले व माओवादी कन्हय् सुथय् हाकनं खँल्हाबंला याइगु जूगु दु ।
