शिविरय् दुपिं अपराधीतय्त सरकारयात लःल्हायेत प्रमया इनाप
प्रधानमन्त्री माधवकुमार नेपालं सर्वसाधरणया हत्या यानाः माओवादी लडाकुतय् शिविरय् सुस्काःतिपं अपराधीतय्त सरकार समक्ष लःल्हायेत इनाप यानादीगु दु । वयेकलं अपराधीतय्त लःल्हायेगु ज्या मजूसा: अपराध नियन्त्रण यायेत सरकार कठोर रुपं प्रस्तुत जुइगु चेतावनी बियादिल ।
शनिवाः काटेश्वरय् याःगु चियापान समारोहलय् न्ववानादिसें वयेकलं हत्या, हिंसा व अपराधय् संलग्न अपराधीततय् कारवाही यायेमफुसा सरकारय् च्वना:च्वनेगुया छुं औचित्य मदइगु धयादिल । माओवादीयात लक्षित यासें प्रधानमन्त्री नेपालं अपराधीतय्त क्याम्प दुने संरक्षण याना:तसाः जनताया शिकार उपिं हे जुइगु धयादिसें सम्बन्धित पार्टीतय्सं अपाराधीतय्त संरक्षण यायेगु सिवें सरकारयात सुपुर्दगी यायेत इनाप यानादिल ।
ज्याझ्वलय् वयेकलं गृहमन्त्री, गृहसचिव व सुरक्षा निकायया प्रमुखतय्त अपराधीया पहिचान यानाः अपराध नियन्त्रण यायेत निर्देशन बीधुंकाःगु जानकारी बियादिल । वयेकलं सुरक्षाकर्मीत पाखें अपराधीतय्त संरक्षण याइगु व कारवाही यायेत ढिलासुस्ती यासा: अज्यापिं सुरक्षाकर्मीत कारवाही याइगु जानकारी बियादिल ।
हत्या, हिंसा व अपराधयात राजनीतिक आवरण बीगु व उकीया बलय् थःपिं शक्तिशाली पार्टी धकाः थुइकिपिं राजनीतिक दलया चरित्रं यानाः नं अपराध नियन्त्रण यायेत व शान्ति सुरक्षाय् समस्या वःगु धयादिल ।
