माओवादीया कारणं विशेष समिति पुनर्गठन जुइमफुगु : रक्षामन्त्री
रक्षामन्त्री विद्या भण्डारीं माओवादी लडाकूया समायोजन व पुर्नस्थापनाया निंतिं गठित विशेष समिति माओवादीया हे कारणं पुनर्गठन जुइमफुगु खँ धयादीगु दु ।
रक्षा मन्त्रालयलय् शुक्रवाः पत्रकार सम्मेलन यानाः मन्त्री भण्डारीं माओवादी अडानया कारणं हे विशेष समिति पुनर्गठन जुइमफूगु धयादिल । माओवादीं समितिया अध्यक्ष वा समितिया दुजःया बच्छिया ल्याख्ये थःगु पार्टीया दुजःतय् दुथ्याकेमाःगु अडान काःगुलिं समस्या पिहांवःगु धयादिल ।
समितिया अध्यक्ष प्रधानमन्त्री जुइगु व्यवस्था जुसां माओवादीं अडान कयाच्वंगु धासें रक्षामन्त्री भण्डारी सहमतिया निंतिं माओवादीं थःगु अडान त्वतेमाः धयादिल । माओवादी लडाकू व्यवस्थापन संविधान निर्माण न्ह्यःहे जुइगु खँ धयादिसें वयेकलं मापदण्ड पूवंकाः जक सेना समायोजन जुइफइगु बिचाः प्वंकादिल ।
पत्रकार सम्मेलनं प्रधानसेनापतिया अवकासया बारे न्यंगु न्ह्यसःलय् मन्त्री भण्डारीं सैनिक ऐन कथं प्रधानसेनापितं थःगु ई पूवंकीगु धयादिल ।
