संविधान संशोधन यायेम्वाः : गिरिजा
येँ / (सन्ध्या टाइम्स) माओवादीं यदि संसद न्ह्याके मबिल धाःसा उकिया दुष्परिणाम नं उमिसं हे फये मालीगु ख्याच्वः नेपाली कांग्रेसया सभापति गिरिजाप्रसाद कोइरालां बियादीगु दु । थौं सुथय् प्रेस युनियन मोरङं विराटनगरय् ग्वसाः ग्वःगु ज्याझ्वलय् न्ववायेगु झ्वलय् वय्कलं उगु ख्याच्वः बियादीगु खः ।
'माओवादीं निरन्तर संसद अवरुद्ध यानाच्वन धाःसा उकिया लिच्वः नं माओवादीं हे फये माली' वय्कलं धयादिल ।
वय्कलं अन्तरिम संविधानय् हे राष्ट्रपति व प्रधानमन्त्रीया अधिकारयात स्पष्ट रुपं न्ह्यथनातःगुलिं हानं संविधान संशोधन यानाः थ्व अधिकार स्पष्ट यानाच्वनेम्वाःगु बिचाः नं प्वंकादिल ।
वय्कलं सहमतिया विकल्प मदु धासें थ्वपाखें सुं नं बिसिउँ वने मजिउगु खँ नं धयादीगु दु । वय्कलं वर्तमान सरकार हे राष्ट्रिय सरकार जूगुलिं माओवादीयात नं थ्वहे सरकारय् वयेत नं इनाप नं यानादिल ।
आराम यायेत निन्हु न्ह्यः विराटनगर झाःम्ह वय्कः थौं येँय् लिहां वयेधुंकूगु दु ।
