वा वयेवं कोशीइ हानं खतरा
येँ / (सन्ध्या टाइम्स) छुं न्हि न्ह्यवंनिसें पूर्वी नेपालय् वयाच्वंगु वाया कारणं सप्तकोशी खुसि हानं बाः वःगु दु । तसकं वा वःगुलिं आः कोशीया बहाव १ लाख ८६ हजार ५०० क्युसेक थ्यंगु दु । थगुने कोशी तटबन्ध तज्याःगु इलय् अन १ लाख ६८ हजार क्युसेक लः बाः वनाच्वंगु खः ।
थौंकन्हय् कोशीइ न्हापा स्वयां १८ हजार ५०० क्युसेक अप्वः लः दुसां स्थानीय प्रशासनं उच्च सतर्कता नालाः भारतयात आग्रह यानाः कोशी बाँधया २५ गू ध्वाखा चायेकूगुलिं तटबन्ध धाःसा कटान याये मफुगु खः । यदि खुसि थुकथं हे बाः वयाच्वन धाःसा सुरक्षाया लागिं बाँधया ५६ गू ध्वाखा मध्यय् मेमेगु ध्वाखा नं चायेके मालेफुगु खँ स्थानीय प्रशासनं धाःगु दु ।
उखे कोशीं बराह क्षेत्रय् कटान यायेगु शुरु याःगु खँ प्राविधिकतय्सं धाःगु दु । उमिगु धापूकथं सुनसरीया बराह क्षेत्रया दक्षिणं पूर्वी किनाराय् कटान यानाच्वंगुलिं उगु क्षेत्र उच्च जोखिमय् लाःगु दु ।
थगुने नं जोखिमय् लाःगु उगु लागाया ९, १०, ११, १२ व १३ नम्बर स्परय् कोशीं प्रहार यानाच्वंगुलिं गुगुं नं इलय् तःधंगु खतरा वयेफुगु खँ नं विज्ञतय्सं धाःगु दु । उकियात नियन्त्रण यायेत जलउत्पन्न प्रकोप कार्यालय विराटनगरं ज्या शुरु यायेधुंकूगु दु ।
