तपाःगु भारतीय नोट प्रचलनय् हयेत महासंघया इनाप
येँ / (सन्ध्या टाइम्स) नेपाल उद्योग वाणिज्य महासंघं न्यासः व द्वःछि वंगु भारतीय नोटयात खुल्ला रुपं कारोबार यायेगु अनुमति बीत इनाप याःगु दु । भारतीय नोटत मध्ये थुगु दरया नोटत नेपालय् प्रतिबन्ध तयातःगु दु ।
विशेषतः नेपालं भारतपाखे थुगु दरया नकलि नोटत वनेगु यानाच्वंगु धासें भारतीय पक्षया इनाप कथं थुकिया कारोबार नेपालय् अवैध घोषणा याना तःगु खः । तर अथे खःसां भारत नापं व्यापार यानाच्वंपिं ततःधंपिं व्यापारीतय्सं अवैध जूसां थुगु दरया नोटत स्वीकार यायेगु याना वयाच्वंगु दु ।
महासंघं थुगु दरया भारतीय नोट खुल्ला रुपं प्रचलनय् हयेगु निंतिं बिउगु सुझावय् न्हू वइगु मौदि्रक नीतिइ थुगु नोटत बैंकं स्वीकार याइगु व्यवस्था यायेत नं इनाप याःगु दु ।
अथे हे महासंघं कालोसूची लानाच्वंपिनिगु बारे नं बिचाः यायेत इनाप याःगु खः । उगु इलय् महासंघं कालोसूची दुथ्यानाच्वंपिंगु ऋणी असुलीया व्यवस्थाया कारणं औद्योगिक क्षेत्रं तःधंगु नोक्सानी फये मालाच्वंगु धासें आःतक दुपिं खराब ऋणत राफसाफ यायेगु निंतिं छगू आयोग स्वनाः वित्तीय क्षेत्रय् वयाच्वंगु समस्या समस्या ज्यंकेत नं सुझाव बिउगु दु ।
महासंघं राष्ट्र बैंकं क्वछिनातःगु नगद मौज्दातयात अुनपातयात ४ दशमलव ५ प्रतिशत यायेमाःगु विदेशं दुहां वइगु छगू खर्बं मल्याक रेमिट्यान्सया सदुपयोग यानाः देय्या अर्थतन्त्र विकासय् लगानी यायेगु निंतिं विकास पत्र व नागरिक वचत पत्र जारी यानाः लगानीया ब्या अप्वयेकेत नं सुझाव बिउगु दु ।
