भंसार प्रमुखया सक्रियताय् चेकजाँच मयासे टि्रपर भारत निकासी
वीरगंज / (सन्ध्या टाइम्स) राजस्व छले यानाः भारत निकासी यायेत्यंगु के.के. क्रसरया ल्वहं लोड यानातःगु टि्रपर भंसारया कर्मचारी व सशस्त्र प्रहरीं ज्वनाः वीरगंज भंसारय् दाखिला याःसां भंसारया प्रमुख केवलप्रसाद भण्डारीं चेकजाँच तकं मयासें त्वःता छ्वःगु दु ।
आर्थिक विधेयक २०६५ कथं अज्याःगु ल्वहंया निकासी यायेबलय् भंसार मूया मूल्याकंन कथं २.५ इन्चया ल्वहं प्रतिघन मिटर गुइतका व व स्वयां च्वय् प्रति घनमिटर स्वसःत्या क्वःछिनातःगुली ताः ई न्ह्यःनिसें उगु क्रसर कम्पनीं भंसारं २.५ इन्च स्वयां च्वय्या ल्वहं गुइतकाया दरं भंसार राजस्व पुलाः भारतय् निकासी याना वयाच्वंगु खः । उगु क्रसर कम्पनीया खुगः टि्रपरं थुकथं निकासी यायेत्यंगु इलय् भंसारया कर्मचारी व सशस्त्र प्रहरीयात शंका वनाः चेक याःबलय् राजस्व छले यानाः भारत निकासी यायेत्यंगु खँ सीवं उमिसं भंसारय् दाखिला याःगु खः ।
भंसारया कर्मचारी कर्णबहादुर विष्ट व बलबहादुर श्रेष्ठया संलग्नाताय् कम्पनीया एजेण्ट सिद्धार्थ क्लियरिङया दीपक भण्डारीं क्वछिनातःगु स्वयां म्हो जक राजस्व पुलाः भंसार पास याना वयाच्वंगु तथ्य पिहां वयेवं ल्वहं नापं उगु टि्रपर चेक हे मयासे प्रतिवेदनया लिधंसाय् भंसार प्रमुख भण्डारीं त्वःता छ्वःगु प्रतिकि्रया बिउगुदु ।
उद्योगं हे खटे यानाहःम्ह इन्जिनियरं टि्रपरय् च्वंगु ल्वहं अढाइ इन्च दुने हे दुगु धकाः बिउगु प्रतिवेदनया लिधंसाय् चेक मयासे थःपिंसं त्वःता छ्वयागु दावी भंसार प्रमुख भण्डारीं बिउगु दु ।
