यमनया विमान हिन्द महासगरय् दुर्घटना

१५३ म्ह यात्रुत दुगु यमनया छगः विमान मंगलवाः सुथय् हिन्द महासागरया कोमोरोसय् दुर्घटना जूगु दु । यमनया राजधानी साना पाखें कोमोरसया राजधानी मोरोनी पाखे ब्वःगु विमान गन्तव्य थ्यने घौच्छि न्ह्य् दुर्घटना जूगु खः । उद्धारकर्मीतय्सं न्यादँया छम्ह मचायात सकुसल जीवित हे लुइकू दु । मेपिं तनाच्वंपिं यात्रुत उद्धारकर्मीतय्सं मालेगु ज्या यानाच्वंसां दक्वं सी धुंकूगु आशंका याःगु दु ।

१४२म्ह यात्रु व ११म्ह चालक दलया दुजःत दुगु विमान तच्वःकं फय् वयेवं कोमोरसय् विमान अवतरणय यायेगु झ्वलय् दुर्घटना जूगु खँ यमनया नागरिक उद्यन विभागं धाःगु दु । विमानय् अधिकाशं यात्रुत कोमोरस निवासीत दुगु खः । फ्रान्सया राजधानी पाखें ब्वःगु एयरबस - ३१० विमान कोमोरसया वयेगु झ्वलय् यमनया राजधानी साना जुयावःगु खः ।

यमनया थुगु विमान दुर्घटना लिपाः थ्व लाःय् एयरबस दुर्घटना जूगु निक्वःगु खुशी खः । थ्वस्वयां न्ह्य जुन १ तारिखया न्हि फ्रान्सया एयरबस ए३३०-२०० ब्राजिलया रियो दि जेनेरिया पाखें फ्रान्सया पेरिसय् ब्वःगु बिमान ब्राजिलय् हे दुर्घटना जूगु खः । उगु दुर्घटनाय् लानाः विमानया दक्वं २२८ यात्रुत सीगु खः ।

More Stories Like this