छाय् थें

हिन्दी चिबाखं

वं लिक्क वनाः सःतल 'मां'
माम्हं लं सुइगु कलया रिंगयात ल्हातं दिकाः न्यन 'छाय् पुता ?'
'बा गबलय् लिहां वइ मां ?'
'थौं छं हानं व हे खँ ज्वनावल ! व आः छाय् वइ पुता ?' अनंलि फिसिक्क न्हिलाः धाल 'छाय् यायेमाःगु…… जिं आनेलालयात आखः ब्वंकाः तःधंम्ह मनू दयेके । जिगु थ्व कलघर जक छुं मजुइमा थः कायया जीवनय् छुं मगाःमचाः जुइके बीमखु ।'

'मां बा वंगु छाय् ?'
'छु धायेगु ग्व'
'धयाः नं मवं ला मां ?'
'मवं ।'
'छाय् …छाय् मां ?'
'छं सिद्धार्थया बाखं ब्वनागु दु ला……मदु का छंत न्यंके जिं - सिद्धार्थ कपिलवस्तुयाम्ह खः । वया बांलाःम्ह कलाः छम्ह दु………?
'छ थें हे ला मां !' कायम्हं दथुइ हे नवात ।
'अथे हे धाःसां जिउ । वया छ थें हे छम्ह तिमिला थें बांलाःम्ह काय दु ।'
सकतां दयां नं दुःख खनाः वं तसकं दिक्क जुयाच्वनी । अथे जुयाः छन्हु चान्हय् व कलाः व काययात त्वःताः जंगलपाखे स्वयाः वनाछ्वत……॥ सन्यासी जुल…॥'
'तर मां ! व ला कपिलवस्तुया राजकुमार खः ………यक्व धन सम्पत्तिया मालिक !'
'अले छु ले ?'
'बा ला गनयाम्ह नं राजकुमार मखु । वया छेँय् मुस्किलं निछाः नयेगु चूलानाच्वंगु दु अय्नं छाय् वंगु ले व ?'
'जिं स्वये ला पुता निम्हं हे दुःख खनाः ग्याःगु थें च्वं ।' थथे धयाः मांम्ह कलघरया रिंगय् ल्हाः चाःहीकल ।

- पृथ्वीराज अरोडा

भाय् हिउम्ह : रमेशकाजी स्थापित

More Stories Like this

दया
सुकरात व बुरा
हस्ताक्षरया मू
छ्यं धस्वाकि
सम्पादकं म्हसीके मफुम्ह महान बाखंच्वमि