दया

हिन्दी चिबाखं

झिगू क्लासया हिन्दीया शिक्षक गुम्ह थःगु साधारण रहनसहन उच्च आचरण व दयाभावया खँय् स्कूलय् हे नांजाःम्ह खः । वं न्हूगु क्लासय् सम्बोधन यानाच्वन, 'जीवनय् साधारण रहनसहन उच्च आचरण स्वयां दयाभावया महत्व तसकं अप्व दु । धाथें ला गुम्हेसिके दयाभाव मदु वयाके मनू धायेकेगु हक मदु । राजकुमार गौतम छन्हु चाःहिउ वँवं यक्व हे तापाक थ्यंकः वन । छथाय् छम्ह माझीं न्यातय्त जालय् क्यंकाः खुसि सिथय् तयातःगु थलय् लाक वांछ्वयाच्वन । राजकुमारं घौपलख माझीं लाःपिं न्यात लखय् वाथावाथा कनाच्वंगु स्वयाच्वन । अनंलि माझीयाके न्यन, 'थ्व न्या दक्व छं छु यायेगु ?
माझीं लिसः बिल 'बजारय् यंकाः मीगु ।'

'थ्व मियाः छंत गुलि ध्यबा वइ ?'

'अथे हे प्यतका न्यातका दां वइ ।'

'राजकुमारं थःगु लुँयागु अंगू माझीयात बियाः न्या दक्वं थम्हं काल अले इमित हाकनं लखय् त्वःताबिल ।
राजकुमारया दयाभावपाखें झीसं छुं सयेकेमाः ।' छम्ह मचा वाथाक्क दन ।
'छं छुं धायेगु दु ला ?'

'खः सर !'

'का धा ।'

'जि छम्ह माझीया काय खः । जिमि अबुं न्हिं न्हिं न्या लानाः बजारय् मी यंकी । न्हिं न्हिं हे धयाथें छुं भचा न्या ल्यँ हे ल्यनी अले मेमेगु तरकारिया पलेसा जिमिसं व न्या हे नयेमाली । न्यातय्गु म्ह स्वःस्वः याइबलय् जिगु मनय् गय् थें गय् थें जुयावइ । म्हिगः बहनी जिं जा नयेमखु धयाबिया । जिं न्याया पलेसा मेगु हे तरकारि दयेकि धकाः धयागु खः । तर जिगु खँ जिमि मां-अबुं मन्यं उल्टां जितः हे ब्वःबिल । जि प्वाथय् पित्याक हे द्यनाछ्वया । बाचा इलय् जि न्ह्यलं चाल । जितः तसकं नये पित्यानाच्वन । जा मनल धाःसा जि सि हे सीगु खः ला धयाथें च्वनावल । जिगु लागी व न्या नयेगु बाहेक मेगु छुं उपाय हे ल्यं मंत ।' मचाया सः खाखातुल । वं शिक्षँकपाखे ख्वबिलु मिखां छक्वः पुलुक्क स्वल ।

शिक्षकं व मचां धाःगु यथार्थय् छक्वः बिचाः यानास्वल । अनंलि ततःपँगु सफू याक्वय् क्यच्यानाः मचाया न्ह्यःने वल अले वयागु ब्वहलय् धाप बिया क्लासं पिहां वनाछ्वत ।

- पृथ्वीराज अरोडा

भाय् हिउम्ह : रमेशकाजी स्थापित

More Stories Like this

छाय् थें
सुकरात व बुरा
हस्ताक्षरया मू
छ्यं धस्वाकि
सम्पादकं म्हसीके मफुम्ह महान बाखंच्वमि