सुकरात व बुरा

यूनानयाम्ह नांजाःम्ह दार्शनिक सुकरात चाःचाःहिउँ शहरय् थ्यंकः वन । अन वं बुरा छम्ह नापलात । वलिसे गफसफ जूबलय् वं थःगु व्यक्तिगत जीवनया दुबिस्ता खँ दक्वं ब्याकल ।

सुकरातं वयागु खँ न्यने धुंकाः धाल, 'छिगु विगत जीवन ला न्ह्यइपुक हे बिनावंगु जुयाच्वन तर आः बुरा जुइधुंकाः छु छु समस्या वयाच्वंगु दुव नं कनादिसँ रे ।'

बुरा फिसिक्क न्हिल अले धाल, 'जिं थःगु पारिवारिक जिम्मेवारी दक्व थः समर्थ कायिपंत लःल्हाये दयाः धुक्क जुयागु दु । इमिसं छु छ धाइ व व यानाबीगु याना छु नकल व नया अले थः छय्पिंलिसे च्वनाः न्हिलेगु म्हितेगु यानाच्वना । मस्तय्सं छुं द्वंकूसां न पंगः मजुया । तर गब्लें छुं खँय् इमिस जिके सल्हा काःवल धाःसा चाहिं जिं थःगु जीवनया दक्व अनुभव कनाः इमिगुपाखें जूगु भूलं यानाः पिदंगु लिच्वःपाखे सचेत यानाबीगु याना । इमिसं जिगु सल्हाकथं ज्या याः मयाः स्वयेगु व कपाः स्याकाच्वनेगु जिगु ज्या मखु । ईपं जिं धाःथे हे जुइमाः धयागु मदु । सल्हा बी धुंकाः नं यदि इमिसं हानं नं भूल यात हे धाःसां नं जिं चिउताः कयामच्वना । उकी नं हानं नं जिथाय् वल धाःसा इमिगु निंतिं जिगु लुखा न्ह्याब्लें चाः । जिं हानं नं खःगु भिंगु सल्हा बियाः बिदा बियाछ्वयेगु याना ।

बुराया खँ न्यनाः सुकुरात तसकं लय्ताल । वं धाल, 'थज्याःगु उमेरय् जीवन गथे हनेमाः धयागु खँ छिं बांलाक हे थूगु जुयाच्वन ।'

More Stories Like this

छाय् थें
दया
हस्ताक्षरया मू
छ्यं धस्वाकि
सम्पादकं म्हसीके मफुम्ह महान बाखंच्वमि