हस्ताक्षरया मू

सुरभ सिंह

छक्वः सेक्सपियरं धाःगु खः नामय् छु तयातःगु दु धकाः सायद उगु इलय् कल्पना तकं याःगु खइमखु कि सुं छम्ह मनूया नां अथवा हस्ताक्षँर मेम्ह मनूया निंतिं सौभाग्य नं जुइफु ।

पश्चिमी मुलुकय् तःदँ न्ह्यवंनिसें हे हस्ताक्षँर उद्योग विकास याना यंकाच्वंगु दु । खला थ्व ज्याय् तसकं सीमित मनूतय्सं हे जक ल्हाः तयाच्वंगु दु तर गुलि नं थ्व ज्या यानाच्वंपिं दु इमिसं फाइदा हे कयाच्वंगु दु ।

थ्व ज्या भचा अद्भूत ला अद्भूत हे खः छाय्कि म्वानाच्वंपिं मनूतय्गु हस्ताक्षरया स्वयां सिनावने धुंकूपिं मनूतय्गु हस्ताक्षरया मू अप्वः कायेदु । थुकी छगू अजीव खँ थ्व नं दु कि हस्ताक्षँर सुं छम्ह भिंम्ह मनूयागु जुलकि थिके जुइगु व मिभंम्ह मनूयागु जुल कि दंक लाइगु नं मखु । गब्लें गब्लें बदनाम मनूया हस्ताक्षँर नांजाःम्ह मनूया हस्ताक्षर स्वयां न मू वंगु जुइफु । मुख्य खँ ला मनूतय्त यइगु व मयइगुली भर परे जुइ ।

गन तक हस्ताक्षरया मूया खँ दु बेलायतया रानी एलिजाबेथ न्हापांम्हया हस्ताक्षँरया मू झिद्वः पौण्ड स्वयां अप्वः तू । सेक्सपियर थ्व मामलाय् दकलय् न्ह्यःने लाः । वयागु हस्ताक्षरया मू ५ लाख पौण्ड स्वयां अप्वः थ्यंगु खः ।

बेलायतया आः दुम्ह रानी एलिजावेथ निम्हम्हया हस्ताक्षँरया मू १२० पौण्ड थ्यं । राजकुमार चाल्स्रया हस्ताक्षरया मू थ्व स्वयां नं दोब्बर वः । इरानया धार्मिक नेता अयातुल्ला खोमेनीया हस्ताक्षँर ४८० पौण्ड तूसा मर्लिन मनरोया हस्ताक्षँरया मू बजारय् ४५० पौण्ड तयातःगु दु । अथे हे हिटलरया हस्ताक्षँरया मू २०० पौण्ड खःसा विन्स्टन चर्चिलयागु ५० पौण्ड कायेगु यानाच्वंगु दु ।

बटन विनेट छगू अज्याःगु नां खः गुगु तसकं कम हे जक चर्चाय् वः । अमेरिकाया स्वतन्त्रता घोषणा याःगु दस्तावेजय् थ्वयागु नं हस्ताक्षर दु । इंगल्याण्डय् बूम्ह विनेटया हस्ताक्षँरया मू ५५ लाख पौण्ड थ्यं ।

यद्यपि थ्व छगू जटील न्ह्यसः खः कि मनूतय्सं छाय् अथे कर्पिनिगु हस्ताक्षर मुनीगु खः । थुगु व्यवसायलिसे सम्बद्ध लन्दनयाम्ह छम्ह मनूया धापू कथं थुकिं झीत उगु युगया इतिहासया बोध याकी । मेता खँ महत्वपूर्ण मनूतलिसे थःगु सम्पर्क व सम्बन्ध दु धकाः क्यनेत नं मनूतय्सं इमिगु हस्ताक्षर मुंकाजुइगु याः । दकलय् तःधंगु खँ ला थ्व ख । कि थुकिं खूब कमे यायेफु ।

More Stories Like this

छाय् थें
दया
सुकरात व बुरा
छ्यं धस्वाकि
सम्पादकं म्हसीके मफुम्ह महान बाखंच्वमि