छफुति लः

निबन्ध

पद्मरत्न तुलाधर

छफुति लः बाः वनीमखु सुनावनी । छफुति लः न्ह्याःवनीमखु गनावनी ।

छफुति लखं सुयातं छुकियातं चुइके फइमखु व थःहे तनावनी । छफुति लखं सुयागुं प्याःचाः लंके फइमखु व थःहे दुसुनावनी ।

छफुति लखय् सु नं छुं नं दुनीमखु व थःहे दुनावनी । छफुति लखं पुखू जुइमखु व थःहे सुकूचिनावनी ।

छफुति लःया खुसि धइगु दइमखु न बुंगाः दइ न तुं दइ वया छुं नं दइमखु । छफुति लःया सागर नं जुइमखु वयात फसं नुनाछ्वइ चां न्हंकाछ्वइ झंकाछ्वइ । छफुति लखं च्याःगु मियात स्याये फइमखु दागयात हुइ फइमखु व थःहे हुया वनी व थःहे फुनावनी । छफुति लःयात सुनानं ग्लासय् थाय् बीमखु नं घलय् हे बाय् बी । पलख दयाः व पलखं हे मदयावनी ।

छफुति लःयात सुनानं त्वनीमखु सुनानं फ्वनीमखु । व ला हाःनाः मदयाः सुनावनी । छफुति लःयात सुनानं कुनी नं मखु व ला थः हे मुक्त जुयावनी थः हे विलिन जुयावनी । लःया अस्तित्व छफुति लखय् दइमखु लःया म्हसीका छफुति लखय् खनीमखु। लःया धर्म छफुति लखय् खनीमखु । लःया गुण छफुति लखय् लुइमखु । छफुति लः लः खयाः नं लः मखु । छफुति लः लःया भ्रम खः । छफुति लः लःया क्षँणिक क्षँण जक खः । छफुति लखय् संसार दइमखु । छफुति लखं स्वां ह्वइमखु बुँ ह्वइमखु । छफुति लखं चलः वनीमखु छफुति लखं खुसिबाः वइमखु । छफुति लखय् न्या म्वाये फइमखु । उकिं छफुति लखय् ला ज्यान नं दइमखु प्राण नं दइमखु । तर छफुति लः लःया रचना खः लःया संरचना नं खः अज्ज छफुति लःहे लःया सृष्टि खः ।

छफुति लखं हे खुसिया रचना याइ । छफुति लखं हे सागर महासागरया संरचना याइ । स्वां सिमा बुँ क्यब छेँ गुँ फुक फुकया आधारशीला हे छफुति लखं छुनाबी ।

छफुति लखं ज्यान व प्राणया संचार शुरु याइ । ध्वंस व विध्वंसया संहार व महासंहारया क्रिया प्रक्रियाय् छफुति लःया नं सहभागिता दयाच्वनी योगदान दयाच्वनी ।

छफुति लः मेमेगु अल्याख फुति फुति लःलिसे छपँ छधी जुइव तिनि वया अस्तित्वयात वया शक्तियात स्वीकार याइगु खः । उकिं लःया छफुति नं लःया छधीया व छपँया प्रतीक एकताया बलय् जक शक्ति दइगु सत्यया छफुति लः धिसिमिसि धाःगु दसि खः दसु खः । लःया सौन्दर्य लःया गाम्भीर्य लःयागु निश्चलता निश्छलता लःया पवित्रता लःया फुक फुक गुणया मू आधार हे छफुति लः खः ।

उकिं छफुति लः रचनाया संरचनाया व सृष्टिया नापं फुक फुकया न्ह्यथना खः । छफुति लःया कल्पना मयासे वया अस्तित्वयात स्वीकार मयासे गुगुं नं सत्यता व यथाथयात थुइके व लुइके फइमखु ।

थुइके फुसा लुइके फुसा फय् तिसिव नं लः पिहां वइ । प्रकृतिया फुक रचनायात तिसिना स्वल धाःसा फुकथासं फुति फुति लःया लः पिहां वइ । प्रकृतिया फुक रचनायात तिसिना स्वल धाःसा फुकथासं फुति फुति जुयाः लःया लः पिहां वइ ।

प्रकृतिया रचना लः मखु लःया रचना प्रकृति खः थें च्वनी । खः कथं स्वये सयेके माः खःकथं लुइके फयेमाः प्रकृतिया प्रत्येक रचनाय् फुति लःया अस्तित्वयात चायेके फइ । उकिं छफुति लःखः वयात छफुति लः कथं हे म्हसीके । वया मेमेगु लःफुतिलिसे ह्वनेगु मेमेगु लःफुतिलिसे स्वायेगु व मेमेगु लःफुतिलिसे छस्वा जुइगु व जायेगु अधिकारयात नं थुइके स्वभावयात चायेके । वया व नैसर्गिक अधिकारया हनन मयाये ।

छफुति लःया मेमेगु लःफुतिलिसे जानाः छपँ छधी जुयाः बाःवनेगु न्ह्याः वनेगु अधिकार व स्वतन्त्रतायात लाका मकाये । छफुति लःया अस्तित्वया आधार जुयाच्वंगु नियमयात व फर्मूलायात सिद्धान्त व विज्ञापनयात सुना नं हस्तक्षेप मयायेमाः ।

छफुति लःया सभ्यता व संस्कृतिपाखें छफुति लःया सभ्यता व संस्कृतिपाखें छफुति लःया स्वतन्त्रता व सार्वभौमिकतापाखें सयेकाः सीका झी मनूतसें नं सार्थक व सुसंस्कृत जीवन हनेफु । शान्त व सुरक्षित जीवनया निंतिं छफुति लःया आदर्शयात सकसिनं नं नाला कायेफु ।

लःया खुसिपाखें लःया सागरपाखे व लःया वर्षापाखें जुइगु ध्वंस विध्वंस व संहारया खँ धइगु छफुति छफुति लःया विद्रोह खः गुकियात सुनानं पने फइमखु । उकिं वयात विद्रोहया लँपुइ घ्वाना मछ्वयेगु खःसा वयात नं न्याय यायेमाः वयात नं सम्मान यायेमाः ।

लः व छफुति लःया स्वतन्त्रता व अधिकारयात सम्मान याये मफुत कि भयानक संहारया सामना यायेमाली । लःया अस्तित्व सामना यायेमाली । लःया अस्तित्व ला तनी हे मखु लःया छफुती छफुती वया अस्तित्व ल्यनाच्वनी । बरु लःया अःखतं वनीपिनि अस्तित्व न्हनावनी लःया दुनेया लःफुतिया अस्तित्व ल्यनाच्वनी ।

साभार : खेलुइताः दँपौ ने.सं. ११२४

More Stories Like this

छाय् थें
दया
सुकरात व बुरा
हस्ताक्षरया मू
छ्यं धस्वाकि