सामुद्रिक रेशमया लँ सम्बन्धी न्हापांगु एक्स्पो

– डा. सर्वोत्तम श्रेष्ठ –
“रेशमया लँ” (Silk Road) धइगु खँग्व: दकलय् न्हापां छम्ह जर्मन भूगोलशास्त्रीं सन् १८७७ स छ्यलादीगु ख: । थ्यंमथ्यं निद्व: दँ न्ह्य: चीनं न्ह्याना: मध्य एशिया जुसें दक्षिण एशिया, पश्चिम एशिया, यूरोप व उत्तर अफ्रिकातक थ्यनीगु व्यापारिक लँयात वय्कलं “रेशमया लँ” धका: नां बियादीगु ख: । लिपा अनुसन्धानतपाखें ऐतिहासिक कालय् चीनं मेमेगु देय्तलिसेया व्यापार याइगु यानात:गु मेमेगु गुलिखय् व्यापारिक लँपुत नं पत्ता लगय् जुजुं वल व उपिं फुक्कसित नं बुलुहुं “रेशमया लँ” धायेगु यानाहल । सामुद्रिक लँपुपाखें मेमेगु देय्तलिसे व्यापार जुइगु व्यापारिक लँयात चाहिं सामुद्रिक रेशमया लँ धायेगु यानाहल ।
चीनियातय्सं थ्यंमथ्यं निद्व: दँ न्ह्य: हे समुद्रय् थीथी क्रियाकलाप यायेगु ज्या न्ह्याकूगु ऐतिहासिक दसुत लूगु दु । तर सामुद्रिक लँपुपाखें व्यापार सुरु जूगु प्रमाण चाहिँ करिब द्व:छि दँ न्ह्य:या जक लुइके फुगु दु । झिंन्यागूगु शताब्दीइ मिङ राजवंशया शासन इलय् सरकारपाखें हे समुद्रय् तत:ग्व:गु जहाजत छ्वया: अन्तर्राष्ट्रिय व्यापार अप्वयेकेगु व मेमेगु देय्तलिसे चीनया मैत्री सम्बन्ध अप्वयेकेगु कुत: या:गु ख: । सुरुया इलय् चीनया मध्य पूर्वी किनारया सहरतय्पाखें थुज्व:गु क्रियाकलापत जुइगु या:गु ख:सा झिंच्यागूगु शताब्दी लिपा चीनया सामुद्रिक व्यापार दक्षिणपूर्वी किनारय् च्वंगु क्वाङ्तुङ प्रान्तया बन्दरगाहतय्पाखें अप्व: जुइगु न्ह्यात । सन् १७५७ सालय् चीनया छिङ् राजवंशया सरकारं क्वाङतुङ प्रान्तया राजधानी शहर क्वाङचुङयात सामुद्रिक व्यापार यायेगु छगू जक बन्दरगाहया रुपय् छ्यलेगु नीति हे दयेके धुंका: ता: ईतक चीनया सामुद्रिक व्यापार क्वाङचउइ जक हे सीमित जू वंगु ख: । आ: नं क्वाङतुङ् प्रान्त चीनया दकलय् अप्व: निर्यात याइगु प्रान्तया रुपय् च्वनाच्वंगु दु ।
सन् २०१३ अक्टोबरय् चीनिया राष्ट्रपति सी चिनफीङ् इण्डोनेशियाया भ्रमणया इलय् अन बियादीगु भाषणय् प्राचीनकालनिसें न्ह्यानावयाच्वंगु सामुद्रिक रेशमया लँया नीछगूगु शताब्दीइ पुनर्निर्माण याना: दक्षिणपूर्वी एशियाली देय्तलिसे सहकार्य यायेगु निंतिं चीन उत्सुक दु धका: धयादीगु ख: । थ्वधुंका: सामुद्रिक रेशमया लँया पुनर्निर्माणया ज्यायात चीन सरकारं विशेष महत्व बीगु ज्या न्ह्याकूगु ख: । नीछगूगु शताब्दीइ सामुद्रिक रेशमया लँया पुनर्निर्माण यायेगु योजना अन्तर्गतया छगू महत्वपूर्ण ज्याझ्व:या रुपय् छुं ई न्ह्य: जक चीनया क्वाङ्तुङ् प्रान्तया तुङ्क्वान् (DongQuan) सहरय् “सामुद्रिक रेशमया लँ सम्बन्धी न्हापांगु एक्स्पो” ग्वसा: ग्व:गु ख: ।
स्वन्हुतक न्ह्या:गु उगु एक्स्पोय् क्वाङ्तुङ प्रान्तया फुक्क उच्चस्तरीय पदाधिकारीपिं न्यागू देय्या मन्त्रीस्तरीय पदाधिकारीपिं, २० गू स्वयां अप्व: देय्या राजदूत अथवा महावाणिज्यदूतपिनिगु उपस्थिति दुगु ख: । क्वाङतुङ प्रान्तीय वैदेशिक मैत्री संघया ब्वनाय् अरनिको समाजया स्वम्ह दुज: दुथ्या:गु प्रतिनिधि मण्डल थुगु त:जिगु एक्स्पोया उले ज्याझ्वलय् ब्वति कायेत तुङ्क्वान् थ्यंगु ख: । थ्यंमथ्यं डेढ लाख वर्ग मिटर क्षेत्रफलया प्रदर्शनी हलय् ग्वसा: ग्व:गु उगु एक्स्पोय् न्यागू अलग क्षेत्र दुगु ख: – थीथी देय्या विशेषता युक्त उत्पादनपिनिगु प्रदर्शनी व विक्री कक्ष, लगानी विस्तार वार्ता कक्ष, पर्यटन तथा साँस्कृतिक सहकार्य वार्ता कक्ष, सीमा वारिपारि ई–कमर्श विस्तार सम्बन्धी वार्ता कक्ष व ढुवानी तथा अन्य सेवा कक्ष ।
थुगु एक्स्पों विदेशी व्यापारी व लगानीकर्तापिन्त न्यागू कथंया व्यापारिक अवसर प्रदान याइगु विश्वास यानात:गु ख: । उगु अवसरत ख: – चीनिया उपभोक्ता बजारय् प्रवेश यायेगु अवसर, क्वाङ्तुङ् प्रान्तया उच्चस्तरीय उत्पादनत ल्ययेगु व न्यायेगु अवसर, चीनय् लगानी यायेत बांला:म्ह पार्टनर मालेगु अवसर, क्वाङ्तुङय् लगानी याना: उद्योग व्यापार सुरु यायेगु अवसर व पर्यटन उद्योग विस्तार यायेगु अवसर ।
एक्स्पोय् सामुद्रिक रेशमया लँय् ला:गु २५ गू देय् व लँय् मला:गु १४ गू देय्या ब्वति दुगु ख: । नेपा:या नां नं सामुद्रिक रेशमया लँय् मला:गु १४ गू सहभागी देय्या सूचिइ तयात:गु ख: तर थीथी हुनिं याना: नेपा:यात बियात:गु उगु प्रदर्शनी स्टलय् नेपाली व्यवसायीत खने मन्त । थुकथं चीन व मेमेगु देय्तलिसे व्यापारिक सम्बन्ध अप्वयेके फइगु नेपा:या निंतिं छगू बांला:गु अवसरया सदुपयोग जुइ मफुत । एक्स्पोया उलेज्यालिसें मेमेगु औपचारिक ज्याझ्वलय् ललितपुर उद्योग तथा वाणिज्य संघया प्रतिनिधि मण्डलया ब्वति धा:सा दुगु ख: ।
(च्वमि अरनिको समाजया नाय: जुयादी ।)

More Stories Like this

नेवा: आन्दोलनया उपलब्धी
जनजाति आन्दोलनय् नेतृत्वया सवाल
जनजाति आन्दोलनय् पद्मरत्नया नेतृत्व
हिन्दूराष्ट्रया खँ आ: छाय् ?
संविधानय् संघीयता गुकथं वइ ?