जिं खनाम्ह श्रीकृष्ण श्रेष्ठ

श्रीकृष्ण श्रेष्ठलिसे म्हसिका गब्ले जुल धइगु लुमं मजु । चवालिस पैंतालिस सालपाखे हे म्हसिउगु जुइमा । तर म्हसिसांनिसें हे वलिसे सम्बन्ध बांला । उगु इलय् नेपा:या फिल्मख्यलय् संघर्ष हे यानाच्वंगु तिनी । राजेश हमालतक नं फिल्मय् मवनिगु ई ख: व । अज्यागु इलय् थ्व ख्यलये पला: न्ह्याकुम्ह श्रीकृष्ण थ:गु मिजासं याना छक्वलं हे लोकंह्वात । निर्माता निर्देशक दथुइ जक मखसे स्वकुमितय् दथुइ नं उतिकं हे लोकंह्वात । श्रीकृष्ण श्रेष्ठ गुलि लोकंह्वा: अले वयात सकसिनं गुलि मतिना या: धइगु खँया दसु हे धायेमालि कि वयागु पार्थिव शरीरया दर्शन यायेत व अन्तिम श्रद्धान्जली प्वंकेत त्रिभुवन विमान स्थलनिसें कोटेश्वर तीनकुने, बानेश्वर, सिंहदरबार अले रत्नपार्क, कमलादी, प्रज्ञा प्रतिष्ठानया कम्पाउण्डनिसें कया पशुपतिया आर्यघाटतक फियांफी मफयेक मनूत वगुलिं हे क्यं । उलिजक मखसे श्रीकृष्ण श्रेष्ठ मदुगु खँ वये धुंका: वयागु दकले लिपांगु फिल्म “कोहिनूर” स्व:व:पिनिगु ल्या: नं ह्वात्त हे बढे जुल । बढे जुया थुलितक थ्यन कि गुंलाथ्व षष्ठी (शन्चरवा:) खुनु छन्हुया दुने हे स्वनिगलय् जक ९७ लाख तकाया बनेज्या जुलसा स्वनिगलं पिने नं छगू त्या करोडसिबें अप्व: बनेज्या जुल । थुकथं “कोहिनूर” फिल्मं छगू हे फिल्मं छन्हूया दुने दकले अप्व: दांया बनेज्या या:गु रेकर्ड तयेत ता:लातसा आ: थ्व फिल्मं न्हापा न्हापाया सिन्दुर, कुसुमे रुमाल, दर्पणछाँया, लुट, ६ एकान ६ थेंज्यागु फिल्मं तयात:गु दकले अप्व: दां कमेया:गु रेकर्डयात लिउने लाकीगु पक्कापक्की जूगु दु ।
थुकथं छगू न्हूगु हे रेकर्ड तयेत ता:लागु जुल “कोहिनूर” फिल्म । अले थ्व फिल्मया हिरो व निर्माता श्रीकृष्ण श्रेष्ठयात नं नेपाल सरकारं वयागु अन्तिम संस्कारयात राष्ट्रिय सम्मान बिया त:धंगु सम्मान ब्यूगु दु । थ्वसिबें न्हापा स्वर सम्राट नारायण गोपाल मदूगु इलय् नं फियांफी मफयेक हे मनूत क्वहाँ व:गु ख: । व धुंका: छम्ह कलाकारया शव यात्राय् थथे मनूतय् खुसीबा:व:गु थ्वहे पालय् ख: । अले छगू संजोग हे धायेमालि कि गायक नारायण गोपाल व नायक श्रीकृष्ण श्रेष्ठ निम्हं नेवा: हे ख: । च्यय्गुसिबें अप्व: फिल्म म्हितूम्ह श्रीकृष्ण श्रेष्ठ छम्ह धिसिला:म्ह नृत्य कलाकार ख: । अले वयागु कलायात्राया दकले न्हापांगु पला: नं मेगु मखसे “कुमारी ब्याले” नांयागु नृत्य नाटिका ख: । कुमारी धयागु नेवा:तय् आराध्य देवी ख: । नेवा: तजिलजिया म्हसिका ख: ।
नेवा: तजिलजिया कुमारी ब्यालेया छम्ह मू हुलाप्याखँमि जुया थ:गु पला: न्ह्याकूम्ह श्रीकृष्ण श्रेष्ठ नेपालभाषाया निगूगु फिल्म “राजमति” नं म्हितल । मणिराज लवट व हिसिला महर्जनया नं मू भुमिका दुगु थ्व फिल्मय् श्रीकृष्ण श्रेष्ठं ल्हासा बन्जाया काय् रत्न जुया म्हितूगु ख: । तसकं हे बांलाक्क अभिनय न्ह्यब्व:गु ख: । थ्व फिल्मय् जिं मुख्य सहायक निर्देशक जुया ज्यायानाबले ला श्रीकृष्णलिसेया स्वापू अझ क्वातुल । “राजमति”या शुटिंगय् वं गब्लें हे छुं कथंया दु:ख मबिउ । धा:बले धा:थाय् धा:गु इलय् थ्यंक वई । सकलेंलिसे न्ह्याइपुक्क ज्या याई । व छम्ह कुशलम्ह डान्सर ख: । उकिं “राजमति कुमति जिके व:सा: पिरती हायबाबा राजमतिचा”म्येया शुटिंगय् डान्स डाईरेक्टर बसन्त श्रेष्ठं वयात भतिचा प्याखंपा: कायेकल । वं बांलाक हे प्याखं ल्हुत । म्येया शुटिंग जूगुलिं निर्देशक नीर शाह शुटिंगय् मव: । मुख्य सहायक निर्देशक जूगुलिं शुटिंगया भाला जित: क्वबिका छ्व:गु । जिं बसन्तदाईयात धयागु नं ख: कि थ्व क्यारेक्टरं थथे प्याखं हुले मजिउ धका नीर शाहजुं धा:गु दु । तर बसन्तदाई माने मजु । श्रीनं प्याखं महुलकिला स्वकुमिं छु धाई धका तर्क तल । श्रीकृष्णं नं बसन्तदाईया खँ हे समर्थन यात । अले ईमिसं चाहेजू कथं हे शुटिंग क्वचायेका । लिपा व म्ये व उकिया हुलाप्याखँ गुलि लोकंह्वात धईगु खँ सकसिनं सिउ ।
“राजमति” फिल्मय् तसकं स्यलाक्क अभिनय या:म्ह श्रीकृष्ण श्रेष्ठयात थ्व फिल्मय् या:गु अभिनयया निंतिं बेस्ट सपोर्टिंग एक्टरया अवार्ड नं वल । खय्तला “राजमति” धुंका: श्रीकृष्ण श्रेष्ठं मेगु नेवा: फिल्म म्हितूगु मदु अय्सां व नेवा: फिल्म व कला ख्यलं गब्लें तामपा धका: धायेमा ।
छक्व नेपालभाषाया एफ.एम गुड नाइट एफ एमय् थ्व च्वमिं अन्तवार्ता कायेगु झ्वलय् श्रीकृष्णं धा:गु ख: कि नेवा: फिल्मया अफर वल धा:सा धेबा मकासे हे म्हिताबिइ तर सुनानं राजमति धुंका अफर मयागुलिं दु:ख नं प्वंकूगुगु ख: । निर्देशक सुरेन्द्र तुलाधरं “पानबति” फिल्मय् छपु म्येय् जूसां वयात म्हितकेगु ग्वसा: ग्व:गु नं ख: । तर ग्वसा: तामलात । गब्लें उसाँय्या हुनिं सा गब्लें मेगु हे हुनिं श्रीकृष्ण श्रेष्ठयात मेगु नेवा: फिल्म म्हितेगु ह्वता चूमलात । गुड नाइट एफ एमयया उगु अन्तर्वाताया इलय् जिं वयात मान मतसे सम्बोधन याना । छाय्धा:सां श्रीकृष्ण न्ह्याब्लें जित थ:हे किजा थें च्वनिगु । तर न्यंमिपिनिसं ईन्टरभ्यु जुयाच्वंगु इलय् हे फोन याना थ्व खँया कुंखिन । वय्कपिनिगु निंतिं ला श्रीकृष्ण धईम्ह छम्ह सेलिब्रिटी ख: । थ: य:म्ह हिरोयात अथे मान मतसे खँ ल्हा:गु वय्क:पिन्सं सहयाये मफुगु जुयाच्वन ।
श्रीकृष्ण श्रेष्ठ नेवा: भावनां जा:म्ह ख: धइगुया मेगु छगू दसु धइगु नेवा: संगीत नाइट ११३३ नं ख: । उकी श्रीकृष्ण श्रेष्ठ मू पाहाँ जुया वल । स्वकुमितलिसे खँल्हाबल्हा यात । म्ये हाला प्याखं नं हुल । उगु इलय् अन व:पिं सकलें श्रीकृष्ण श्रेष्ठया थ्व भावना खना तसकं प्रभावित नं जूगु ख: । अले वहे ज्याझ्वलय् श्रीकृष्ण श्रेष्ठं थ: न्ह्याबलें नेवा: ज्याझ्वलय् ब्वति कायेत व नेवा: फिल्म म्हितेत तयार दुगु खँ नं कन । थ्व ज्याझ्वलय् वयेत इनाप यायेत जि व सुजीब (नेवा: जागरण मञ्चया अध्यक्ष सुजिब बज्राचार्य) हे वनागु ख: वयागु न्हूगु व्यापार कथं खोले जूगु होटेल ईन्द्रेणी हिमालयस । जिमिगु इनाप माने जुइत वं भ्याभतिचा नं ई मका: । थुकथं थ: दुने दुगु नेवा: भावना न्ह्य:ब्वम्ह श्रीकृष्ण श्रेष्ठ लिपा थज्यागु ज्याझ्वलय् वयेगु मंदुसां वये मफुत । तर थ: नं नेवा: ख: धइगु भावनां धा:सा वं गब्लें तापाना मच्वं । श्रीकृष्णलिसे दकले लिपा नापलागु धइगु वयागु इहिपाया दिं खुन्हु ख: । अनं लिपा हनिमुन धका: भारतया शिमला वंगु बुखँ वल । अले अन हे म्हसुकुमदयेका दिल्ली वास: याक: वन धईगु नं वल । अन वास: याका च्वंगु इलय् वयात डिप निमोनिया जूगु धका: जक खबर वयाच्वन । इमिगु फिल्म “कोहिनूर” रिलिजया इलय् लाक्क नेपा: लिहां वइ धइथें जा:गु बुखं नं वल । उसाँय् मदुसां स्वकुमिया नामय् सन्देश नं छ्वयाहल । फिल्म “कोहिनूर” रिलिज जुल । रिलिज जूगु छन्हू लिपा हे श्रीकृष्ण श्रेष्ठं संसार त्वतावंगु बुखँ वल ।
ने.सं. ११३४ गुंलाथ्व पुन्ही (गुंपुन्हि) खून्हू सुथय् आकाझाकां श्रीकृष्ण श्रेष्ठ मदूगु खबर वल । तर थ्व खबरय् विश्वास यायेत सकलें ग्यात । छगू ला गुंपुन्हि थेंज्यागु ख्या:यायेगु नख: उकिसनं न्हापा झिन्यादँति न्ह्य: छक्व: नं श्रीकृष्ण श्रेष्ठ भारतय् वास: याकाच्वंगु इलय् थथे हे श्रीकृष्ण मन्त धका: फैले जूगु खँ हल्ला हे जक साबित जूगु ख: । उकीं थ्व पालय् नं अथे हे जुइफु वा अथे हे जुइमा: धका मनंतुंपिं यक्व हे दत । तर अथे मजुल । थुकथं सकसियां य:म्ह अले तसकं भिंम्ह श्रीकृष्ण श्रेष्ठया थौं भौतिक शरीर झी दथुइ मन्तसां वयागु गुण व वयागु फिल्मया माध्यमं सदासर्वदा झी दथुइ म्वानां तुं च्वंगु दनि ।
‘राजमति मबिल धा:सा काशी वनेत्यल’ धका धा:म्ह श्रीकृष्ण श्रेष्ठ काशी मखु गब्लें सुं लिहां मवइ थाय् वना छ्वल । वयागु शरीरं त्व:ता वंसां वयागु फिल्म व वयागु गुणया हुनिं व सदांसदां लुमना च्वनि । अमर जुया च्वनि ।

More Stories Like this

कलाकारिताय् न्हय्न्यादँ बिके धुंकूम्ह भृगुराम श्रेष्ठ
हङकङ अवार्डय् नेवा: फिल्म
राजमतिनिसें किर्तिलक्ष्मीतकया यात्राय् हिसिला
चम्सुरीकथं नांजा:म्ह पल्पसा डंगोल
नेवा: संकिपा नख:या झ्वलय्