थोपा थोपा अभियानं साहित्यकार माधव मूलयात ग्वाहालि याइगु

येँं÷मानवीय सहयोगया भावनायात संस्कार दयेकेगु आज्जुं नीस्वनातःगु थोपा थोपा अभियानं साहित्यकार माधव मूलयात २५ द्वः तका आर्थिक ग्वाहालि याइगु जूगु दु । साहित्यकार मूल मृगौला ल्वचं कयाः वासः याकाच्वनादीगु दु ।

थोपा थोपा अभियानया प्रमुख सुजीव बज्राचार्यया संयोजकत्वय् वंगु शनिवाः च्वंगु मुँज्यां थथे ग्वाहालि यायेगु निर्णय याःगु खः । उगु अभियानं लय्पतिकं ग्वाहालिया भावना दुपिं मनूतय्पाखें स्वेच्छिकरुपय् ग्वाहालि मुंकेगु याना वयाच्वंगु दु । अभियानं आर्थिक वर्ष २०७० माघनिसें २०७१ असारतक मुंगु उगु दां साहित्यकार मूलयात बीगु निर्णय याःगु खः ।

अभियानं थ्वसिबें न्ह्यः ख्वपया अग्निपीडित परिवार, दार्चुलाया बाढीपीडित परिवार, निक्वःगु संविधानसभाया चुनावया झ्वलय् बम विस्फोट जुयाः घाःपाः जूम्ह समीर खड्गी व नेपालभाषा कार्यकर्ता पुष्परत्न ताम्राकार स्वीटहर्टया म्ह्याय्या वासःया निंतिं आर्थिक ग्वाहालि उपलब्ध याके धुंकूगु दु ।

अभियानया प्रमुख सुजीव बज्राचार्यं थुज्वःगु मानवीय सेवा यायेगु आज्जुयात संस्कार दयेकेगु ज्याय् सकसितं ग्वाहालि यानादीत इनाप यानादिल ।