न्हापांम्ह सगरमाथा आरोही रामकृष्ण श्रेष्ठया स्वक्व:गु आरोहण ग्वाहालि समितिया प्रतिवेदन

ने.सं. ११२० बछलागा: तृतिया खुन्हु न्हापां सगरमाथा आरोहण यानादीम्ह नेवा: सगरमाथा आरोही भाजु रामकृष्ण श्रेष्ठं थुगुसी स्वक्व:गु खुसिइ सगरमाथा आरोहण यायेगु ग्वसा: ग्वयादीगु ख: । थुगु सगरमाथा आरोहण विश्व शान्तिया निंतिं स्वच्छ वातावरण धइगु मू नारा बिया: यायेगु वय्क:या ग्वसा: जूगुलिं वय्कलं थुगु ग्वसा:यात ता:लाकेगु निंतिं विशेषत: नेवा: समाजपाखें आर्थिक, भौतिक व नैतिकरुपं ग्वाहालिया अपेक्षा यानादीगु ख: । थ्वहे अपेक्षाकथं वय्कलं थ:गु हे त्वा: येँ महानगरपालिका १५ वडाय् सत्तीपिं पासापिं विशेषत: भाजु ज्ञानेन्द्र बज्राचार्य, भाजु धनबहादुर तिमिलापिं नाप सहलह यायेगु यानादीगु ख: । अथेहे १५ वडाया पूर्वनाय: भाजु इश्वरमान डंगोल, जीवनराम श्रेष्ठपिंनाप नं वय्कलं सहलह यानादीगु ख: । तर थथे सहलह जक जुल, व्यवस्थित रुपं स्वक्व:गु आरोहण यायेगु निंतिं ज्या मन्ह्यात धइगु खँयात वा: चायेका: वय्क: नेवा: जागरण मञ्चनाप सहलह यायेत झायादिल ।
थ्वहे हुनिं अन्तत: वय्क:यात फुक्क पक्ष जाना: ग्वाहालि यायेगु निंतिं दकलय् न्हापां वय्क:नाप सहलह व्यापिं पासापिं २०७० चैत्र ११ गते नेवा: जागरण मञ्चया ज्याकुथिइ भाजु इश्वरमान डंगोल, ज्ञानेन्द्ररत्न बज्राचार्य, सत्यनारायण डंगोल, सर्वज्ञ बज्राचार्य, राजीव सेढाईं, ल्हाक्पा शेर्पा व जागरण मञ्चया नाय: सुजीव बज्राचार्यपिनि दथुइ मुँज्या च्वन । उगु मुँज्यां सरोकारवाला सकल पक्षतय्गु मुँज्या स:तेगु क्व:छित ।
उगु हे मुँज्यां चैत्र १६ गते नेवा: जागरण मञ्चया ज्याकुथी भाजु सत्यनारायण डंगोलया सभापतित्वय् च्वंगु मुँज्यां नेवा: सगरमाथा आरोही रामकृष्ण श्रेष्ठ सहयोग समिति नीस्वनेगु निर्णय जुल । उगु समिति संयोजक छम्ह मेगु मुँज्यां ल्ययेगु क्व:छिउगु ख: । समितिइ भाजु सत्यनारायण डंगोल, भाजु सुजीव बज्राचार्य, भाजु ज्ञानेन्द्ररत्न बज्राचार्य, भाजु सर्वज्ञ बज्राचार्य, भाजु राजीव सेढाईं, भाजु ल्हाक्पा शेर्पा, भाजु इश्वरमान डंगोल, भाजु पवित्र बज्राचार्य व भाजु राजेन्द्रमान श्रेष्ठसहितया दुज: जुया: च्वनादीगु ख: । उगु हे मुँज्यां १. सदस्यता पूर्णता बीगु, २. सल्लाहकार समिति गठन यायेगु, ३. प्रचार उपसमिति गठन यायेगु, ४. आर्थिक उपसमिति गठन यायेगु, ५. परिचालन उपसमिति गठन यायेगु क्व:ज्यूगु ख:सा पूर्ण सदस्यताया प्रस्तावय् नरेन्द्र मानन्धर, सुरेश मानन्धर, महेन्द्ररत्न शाक्य, विजय माली, नविन मानन्धर, मचाराजा महर्जन, ज्ञानेन्द्र तुलाधर, शैलेन्द्र बज्राचार्य, सूर्यबहादुर श्रेष्ठ, भगवान शाक्य, धनबहादुर तिमिला, विद्यासुन्दर शाक्य, महेन्द्ररत्न बुद्धाचार्य, यज्ञ तुलाधर व उमेश स्थापित, दिनेश श्रेष्ठपिन्त ल्ययेगु ज्या जुल ।
अथेहे सल्लाहकारकथं लक्ष्मीदास मानन्धर, पद्मरत्न तुलाधर, मल्ल के. सुन्दर, नरेशवीर शाक्य, पूर्वमन्त्री हिसिला यमि, तीर्थराम डंगोल, कृष्णगोपाल श्रेष्ठ, सभासद्पिं लक्ष्मण राजवंशी, भीमसेनदास प्रधान, राज्यलक्ष्मी श्रेष्ठ, रामवीर मानन्धर, चन्द्रलाल महर्जन, अथेहे सुरेन्द्रवीर मालाकारयात ल्ययेगु ज्या जुल ।
अथेहे उगु हे बैठकं आर्थिक संयोजककथं क्लाइम्बिङ क्लव व सहयोग समितिया स्वम्ह सदस्यतय्त भाला बीगु नं क्व:जित ।
अथेहे २०७० चैत्र १६ गते थँबहिलिइ च्वंगु होटल च्वाइसय् पूर्ण बैठक च्वनेगु निर्णय नं जुल । उगु पूर्ण बैठकं सुुरेन्द्रवीर मालाकारयात संयोजक कथं ल्ययेगु ज्या जुल ।
रामकृष्ण श्रेष्ठ सहयोग समितिं दकलय् न्हापांगु ज्या कथं आर्थिक सहयोग संकलन यायेगु आज्जुकथं चैत्र २७ गते नेपा: ब्याङ्क्वेटय् हनेबह:म्ह सल्लाहकार लक्ष्मीदास मानन्धरया सभापतित्वय् मुँज्या च्वना: आर्थिक संकलनया ज्या गुकथं जुयाच्वन धइगु सम्बन्धय् सहलह जुल । सगरमाथा आरोही रामकृष्ण श्रेष्ठयात ग्वाहालिया निंतिं थीथी संघसंस्था व व्यक्तिपाखें थुकथं आर्थिक संकलन व बचं पौ प्राप्त जूगु दु ।
मुक्कं आर्थिक ग्वाहालि दुत व:गु ध्यबा ४,८२,१००/– तका दां सगरमाथा आरोही रामकृष्ण श्रेष्ठयात ल:ल्हाये धुनागु दुसा बचं कथं ल्यं दनिगु ध्यबा ५,३०,०००/– तका धा:सा उठय् जूगु मदुनि । मुक्कं उठे जूगु व बचं याना: १०,१२,१००/– तका मुंगु जुल । (थुकिया विवरण च्वय् स्वयादिसँ)
अथेहे चैत्र ३० गते क्षेत्रपाटी पार्टी प्यालेसय् थीथी संघसंस्था, समाजसेवी, राजनीतिज्ञपिनिगु भेला याना: सगरमाथा आरोहणया तयारीया जानकारी बीगु ज्या जुल ।
आरोही रामकृष्ण श्रेष्ठं बैशाख ३ गते स्वक्व:गु सगरमाथा आरोहण यायेगु निर्णय या:गुलिं वय्क:यात भिंतुना व बेलि भ्वय् कथं हनेबह:म्ह सल्लाहकार लक्ष्मीदास मानन्धरया छेँ थँहितिइ बैशाख २ गते सनिलय् औपचारिक ज्याझ्व: याना: वय्क:यात भिंतुना देछायेगु लिसें बेलि भ्वय्या ज्याझ्व: जुल सा बैशाख ३ गते सगरमाथा आरोहण ता:लायेमा धका: वय्क:या छेँय् समितिया दुज:पिं वना: भिंतुना देछायेगु व बिदाइ बीगु ज्या नं जुल ।
सगरमाथा आरोहणय् झायेधुंका: आरोही रामकृष्ण श्रेष्ठं समितिया दुज:पिन्त आरोहणया जानकारी बियादीगु ख:सा वय्क:या थुगु जानकारी कथं स्वक्व:गु सगरमाथा आरोहण सफल जुइगु पूर्ण भलसा झीसं कयागु ख: । तर आकाझाकां बैशाख ५ गते सगरमाथाय् त:धंगु दैवीप्रकोपं हिमाल आरोही व आरोहीपिन्त ग्वाहालि याइपिं १६ म्ह मदुगु दु:खद् घटनां याना: थुगुसी आरोहणया ज्याय् त:धंगु पंग: वल सा स्थानीय शेर्पातय्सं थुगुसी सगरमाथाया हाकुगु दँकथं हनेगु निर्णय जुइवं आरोही श्रेष्ठया सगरमाथा आरोहण बिचय् हे त्वा:द:गु यथास्थिति झीगु न्ह्य:ने दु ।
सहयोग समितिपाखें तसकं म्हो इलय् अथे धइगु चैत्र ११ गतेनिसें बैशाख २ गते तकया दुने मुक्कं २१ न्हु स्ववा:या दुने आर्थिकरुपं गुगु ग्वाहालि यायेफत व सकारात्मक खनेदु । अथेहे छम्ह नेवालं स्वक्व:गु सगरमाथा आरोहण यायेत्यंगु विषययात नेवा:तय् दथुइ चर्चा परिचर्चा व दायित्वबोध याकेगु गुगु ज्या जुल, थ्व नं समितिया सफलताकथं हे कायेमा: ।
समितियात म्हो इलय् ज्या यायेमा:गु हुनिं यक्व हाथ्यात व:सां थ्व हाथ्यायात चीका: वनेगु निंतिं हनेबह:म्ह सल्लाहकार समाजसेवी, भाषासेवी, उद्योगपति, नेवा: न्ह्यलुवा लक्ष्मीदास मानन्धरजुयात झी सकसिनं यक्व यक्व सुभाय् मबिसें मगा: । वय्क:या तफा:गु नुग: व नेतृत्वया हुनिं समितिं म्हो इलय् नं थुलिमछि ज्या याये फुगु ख: ।
अथेहे एयर एशियाया विनय शाक्यपाखें नं आरोहणया निंतिं त:धंगु आर्थिक ग्वाहालि चूलाका ब्यूगुलिं समितिया उत्साह बढे जूगु ख: । वय्क:यात यक्व सुभाय् देछानाच्वना ।
अथेहे म्हो इलय् प्रचार प्रसारया ज्या यानादीगुलिं सन्ध्याटाइम्स न्हिपौ, अप्सरा वा:पौ, पेज थ्री बा:छिपौ, लहना वा:पौ, नेपालभाषाया एफएम ज्याझ्व:त व उज्यालो एफएम, नेपाल समाचार पत्रयात नं सुभाय् देछानाच्वना ।
अथेहे थ्व समितियात आरोहण सम्बन्धय् नेवा:तय्गु दथुइ स्पष्ट खँ तया: ध्वाथुइकेगु ज्या यानादीम्ह राजीव सेढाईंयात नं सुभाय् मबिसें मगा: । वय्कलं सगरमाथा आरोहणया महत्व व विश्व वातावरण सम्बन्धय् अतिकं बांलाक्क ध्वाथुइकेगु ज्या यानादीगु ख: ।
अथेहे क्षेत्रपाटी पार्टी प्यालेसया प्रोपाइटर व नेवा: जागरण मञ्चया दुज:लिसें समितिया दुज: दिनेश श्रेष्ठ नं सुभाय्या पात्र ख: । वय्कलं आरोही श्रेष्ठया निंतिं क्षेत्रपाटी पार्टी प्यालेसय् नि:शुल्क थाय्, नसात्वँसाया व्यवस्था यानादीगु ख: ।
अथेहे नेपा: ब्याङ्क्वेटं नं थाय् बिया: ग्वाहालि या:गुलिं मचाराजा महर्जनलिसें ब्याङ्क्वेटया सकल दुज:पिन्त नं सुभाय् देछानाच्वना ।
अथेहे नेपाल पर्वतारोहण संघया महासचिव राजेन्द्रमान श्रेष्ठयात नं सुभाय बियाच्वना । वय्कलं थँबहिलिइ च्वंगु होटल च्वइसया थाय् व नसात्वँसाया व्यवस्था यानादीगु ख:सा पर्यटन बोर्डयालिसें आरोहण सरोकार सरकारी निकायलय् विशेष पहल नं यानादीगु ख: ।
अथेहे अति व्यस्तताया बाबजूद नं सभासद् भीमसेनदास प्रधान, राज्यलक्ष्मी श्रेष्ठ, पूर्वमन्त्री तीर्थराम डंगोलयालिसें सकसिनं आर्थिक ग्वाहालिया निंतिं गुगु कुत: यानादिल उकिया निंतिं सुभाय् देछानाच्वना ।
अथेहे सहयोग समिति नीस्वना: ज्या याकेगु निंतिं कुत: यानादीम्ह ज्ञानेन्द्र बज्राचार्य, धनबहादुर तिमिलायात नं सुुभाय् देछानाच्वना ।
लिसें नेवा: जागरण मञ्चं सकल पक्षयात सरोकार तायेका: ज्या या:गुलिं जागरण मञ्चया सकल दुज:पिन्त नं थ्व इलय् सुभाय् मबिसें मगा: ।
अथेहे प्राविधिक ज्याय् ग्वाहालि यानादीगुलिं रत्नकाजी मन, मदन डंगोलपिन्त नं यक्व यक्व सुभाय् देछानाच्वना । वय्क:पिनिपाखें थ्व ज्याया निंतिं इलय् प्राविधिक ज्या जूगु हुनिं म्हो इलय् नं समितिं थ:गु आज्जु पूवंकेत ता:ला:गु दु ।
अन्तय् नेवा: काय्मचा रामकृष्ण श्रेष्ठं स्वक्व:गु आरोहण याना: नेवा: जाति व नेपा:यात अन्तर्राष्ट्रिय ख्यलय् म्हसीकेगु गुगु आज्जु ज्वना: थ्व अभियान न्ह्याकूगु ख: थ्व अभियानयात ग्वाहालि यायेगु ह्व:ता: समितियात बिल, उकिया निंतिं झी सकसियापाखें आरोही श्रेष्ठयात यक्व यक्व सुभाय् देछासें सदां वय्क: छम्ह सफल आरोही जुयाच्वने फयेमा धका: कामना यानाच्वना । लिसें वय्क:या थ्व सफलता नेवा: जातिया निंतिं व नेपा:या निंतिं पाय्छिकथं छ्यले फयेमा धका: नं कामना याना ।
समितिया संयोजक, दुज:पिं, सल्लाहकारपिं हनेबह:पिं सकसितं हाकनं छक्व: सुभाय् देछासें थुगु समिति विघटन जूगु घोषणा नं यानाच्वना । सुभाय् ।
सुजीव बज्राचार्य
११३४ जेठ २४ गते शनिवा:

More Stories Like this

‘नेवा: राज्यया ध्वाँय् छेँय्छेँय् थ्यंकेमा:’
काठमाडौं महानगर विकास समूहया अपील
प्रधानमन्त्री भट्टरार्इ नं ‘भान्तांभुन्तुं’
अमेरिकी राजदूतया फेशबुक सन्देश नेपा:या मामलाय् हस्तक्षेप
ल: व ख: