दरवार हत्याकाण्डय् ‘रअ’ मखु ‘सिआईए’ नाय: हँ

जुजु वीरेन्द्र व राजीव गान्धीया दथुइ सार्क सम्मेलनया झ्वलय् जूगु विवाद, भारतं नाकाबन्दी त:गु, राजीव गान्धीया हत्याय् जैन आयोगया रिपोर्टय् लानि ऐश्वर्यया नां व:गु इत्यादि घटनाक्रमं याना: २०५८ जेठ १९ गते चान्हय् जुजु वीरेन्द्रया वंशनाश जुइक जूगु दरवार हत्याकाण्डय् मूलत भारतीय जासूसी संस्था ‘रअ’या प्रमुख ल्हा: दयेमा: धइगु प्रस्थापना आपा: चले जुयाच्वंगु ख: । विवेक कुमार शाहं च्व:गु ‘मैले देखेको दरवार’ धइगु सफुती नं भारतपाखे हे संकेत यानात:गु दु । थ्व ल्याखं ‘रअ’ नाय: व ‘सिआईए’ आदि चाहिं मतियार जक जुइमा: धइगु प्रस्थापना हे आपा: न्यनाच्वंगु ख: ।
तर आ: धा:सा थुकी सिआईए नाय: व ‘रअ’ मतियार जक जूगु न्हूगु प्रस्थापना पिहां व:गु दु । भारतं हे दरवार हत्याकाण्डय् ‘रअ’ व भारत प्रयोग जक जूगु व थुगु हत्याकाण्ड तिब्बतयात घेराबन्दी यायेगु अमेरिकी रणनीतिया छगू योजना जूगु खँ पिहां व:गु दु । भारत प्रयोग जक जूगु व नेपालय् अमेरिका व इयूया गतिविधि तच्व:गु जूगुलिं भारतीयतसें बांलाक्क बिचा: याइगु जुयाच्वंगु खँ आ: न्यनेदया व:गु दु ।
नेपालय् राजदूत जुयावंम्ह नान्सी पावेल भारतय् राजदूत जूवंगु व वं राजीनामा बीमा:गु, थ्वयां न्ह्य: भारतीय जासुसी संस्था ‘रअ’या नाय: पदय् न्हापा नेपा: हे स्वयाच्वंम्ह आलोक जोशी व:गु, हानं कनकमणि दिक्षितया खाताय् ६ करोड दां भारतीय पक्षं फोटोकपि बिया: नांगां यानाब्यूगु भगतसिंह कोश्यारी वया: अमेरिका व इयू नं नेपालय् यानाच्वंगु ग्वाहालिया ल्यूने निहित स्वार्थ दु धका: धा:गु हानं न्हूम्ह भारतीय प्रधानमन्त्री नरेन्द्र मोदीं नं नेपा:लिसेया स्वापू क्वातुकेत ब: बियाच्वंगु आदिं याना: थ्व खँयात हे पुट जूवंगु दु ।
न्ह्याग्गु थजु, थुज्व:गु प्रस्थापनात नं अजीव अजीव पहलं न्यनेदइगु जुयाच्वन । तर थ्व खँ सत्य ख: कि २०४६ सालया आन्दोलन लिपा दरवारं अमेरिकानाप हे स्वापू बल्लाकूगु ख: । वहे अमेरिकां दरवार सिधयेकल । हानं २०४६ सालया आन्दोलनलिपा दरवारं गिरिजाया ब्वहलय् गया: नेवा:तय्त नं क्वफा:गु ख:, आ: वहे बम्र्हूतसें नेटवर्क बल्लाका: राजतन्त्र नयाबिल । राजनीतिइ थुज्व:गु ला जुयाच्वनीगु जुयाच्वन ।

More Stories Like this

पहिचानसहितया संघियताय् नेतातय्गु ग्याचिकु
कोइराला सरकार न ख्येँय् चाल न हँय्या चाल
निर्वाचनया निष्पक्षताय् ब्वलंगु न्ह्‍यस:
अधिवेशनं ब्यूगु सन्देश
न्यायाधिश जुइत ध्यवा नकेत वंगु न्यायपालिका न्ह्‍यस: