अमर संगीत स्रष्टा राजभाइ बज्राचार्य

विजयरत्न असंबरे
अबु स्वर्गीय आशाकाजी बज्राचार्य व मां स्वर्गीय सानुमाया बज्राचार्यया कोखं २००८ फागुन १३ गते जन्म जूम्ह राजभाइ बज्राचार्य ६२ दँया उमेरय् वंगु बैशाख १७ गते खुनु थ्व संसार त्व:ता वन । वि.सं. २०३४ सालय् वाणिज्य शास्त्रय् स्नातक यानादीम्ह मदुम्ह राजभाइ बज्राचार्यं कलानिधि संगीत विद्यालयस संगीतया शिक्षा कयादीगु ख: । अन वय्क:यात स्व. चेतनाथ शर्मा व रंगराव काडम्बरी गुरुपिसं संगीतया ज्ञानबिल ।
संगीतया ख्यलय् तसकं नुग: क्वसा:म्ह राजभाइ बज्राचार्यया दकलय् लिपांगु एल्बमकथं ‘बुद्धले पाइला टेकेको धर्ती’ उखुनु २०७० फागुन २८ गते पिदन । वय्क:या दकलय् न्हापांगु एल्बम म्यूजिक नेपालं पिका:गु वय्क:या एकल रचना व संगीतय् “रश्मी” ख: । अनंलि राजभाइ बज्राचार्य व अमरराज शर्माया मंका: लसय् बुद्धया भजन मुना “बुद्धया रश्मी” पिदन ।
अथेहे तुं विराटनगरया उपासिका संघया कुतलय् “प्रज्ञा रश्मी” पिदन । अनंलि नेमवीर शाक्यया कुतलय् आधुनिक म्ये व भावुक म्ये मुना “विडम्बना” पिदन । अथेहे तुं “जि ल्याय्म्ह जुया वल हँ” अले “भजनशिक्षा” नांयागु एल्बम नं पिदन । नेपाल टेलिभिजनय् पिदंगु नेवा: टेलिफिल्म “पला:ख्वाँय्”या वय्क: संगीतकार ख: ।
संगीत ख्यलय् जक मखु वय्क: कलाया मेमेगु ख्यलय् नं उतिग्यंक हे ल्हा: दुम्ह व्यक्तित्व ख: । संगीतकार अमरराज शर्मां च्वयादीगु “चिरिमां” नांयागु दबू प्याखंया वय्क: निर्देशक ख: । वय्कलं उडुम्बरा, अजातशत्रु, सेरी बन्जा, दोषी सु व पछुतो नांयागु नाटकय् नं संगीत सिर्जना यानादीगु दुसा चिरिमां, मिला:पुसिं, म्वाना च्वंगु लाश नांयागु नाटकया निर्देशक जुया जक मखसे छम्ह संगीतकार जुया नं ज्या यानादिल । अले डाइलग नं च्वयादिल । द्वन्द्व नं स्यनादिल । हुला प्याखं नं स्यना दिल । थुकथं वय्कलं थ: कलाया विविध पक्षय् नुग: क्वसा:म्ह धइगु खँ सकसिया न्ह्य:ने क्यनादिल ।
कला पारखी व कलाय् मन दुबिउम्ह राजभाइ बज्राचार्य आपालं संगीत कासाय् निर्णायक जुया: थ्व ख्यलय् पला: न्ह्याकूपिन्त ह:पा: व तिब: बियादीगु दु । यलय् जूगु अन्तर स्कूल नेपाली लोक संगीत प्रतियोगिता, श्रीघ: विहारय् जूगु क्षेत्रीय बौद्ध भजन प्रतियोगिता, फम्पी जूगु बाँसुरी बादन प्रतियोगिता, स्वयम्भू ज्ञानमाला भजन खलकं या:गु बौद्ध जागरण संगीत प्रतियोगिता लगायत आपालं संगीत कासाय् वय्क: निर्णायक जुयादीगु दु ।
आपालं आपा: सिरपा व सम्मानं छाय्पियात:म्ह मदुम्ह राजभाइ बज्राचार्ययात श्रीकृष्ण प्रणामी युवा परिषद्पाखें भक्ति संगीतय् ह:पा: सिरपा, सनातन धर्म ललितपुर शाखायागु कासाय् ह:पा: सिरपा, उपत्यकाव्यापी बुद्ध भजन प्रतियोगिताय् लिउ सिरपा: झी हौग: पुच:या ग्वसालय् जूगु ललितपुरव्यापी आधुनिक गीत प्रतियोगिताय् स:पाखे न्हापा सिरपा वल ।
अथेहे तुं वय्क:यात नेक्स्ट मोडल नेपालपाखें “लिटल स्टार प्यारेन्टिंग २०७०” सम्मानं छाय् पिल सा बज्राचार्य पूजाविधि व फम्पि कुलेखानी बहुउद्देश्यीय सहकारी संस्थापाखें नं सम्मानित जूगु दु । अक्षयेश्वर महाविहारपाखें वि.सं. २०५२ य् सम्मान, विश्व शान्ति पुस्तकालयपाखें सम्मानया नापनापं बज्र सिरपा: समिति, त्रिवेणी कल्चर सेन्टर, ज्ञानमाला भजन संघ स्वर्ण जयन्ती सम्मान, फर्पिङ्ग गोर गणेश नृत्य प्रशिक्षण केन्द्रकार सम्मान, संगीत शिक्षा प्रतिष्ठान, नेपाल बौद्ध परिषद्, पद्मावती बचत तथा ऋण सहकारी संस्थापाखें सम्मान, विराटनगर उपासिका संघपाखें सम्मानलिसें आपालं सम्मान व सिरपालं छाय्पिउम्ह राजभाइ बज्राचार्य देय्या अमूल्य नीधि ख: । छम्ह अमर संगीत स्रष्टा ख: ।

More Stories Like this

नेपालभाषा ल्यंकेगु लँय् लक्ष्मीदास मानन्धर
मचाम्ह हिरोइन नस्वा: जोशी
बहुप्रतिभाशाली साहित्यकार गिरिजाप्रसाद जोशी
आन्दोलनकारी साहित्यकार राजा शाक्य
लक्ष्मण राजवंशी