किपुलिइ शहिद दिवस हन

दँय्दसं थें थुगुसी नं बिहिवाः किपुलिइ शहिद दिवस हन । २०४६ सालय् तात्कालिन पञ्चायती व्यवस्थाया विरुद्धय् न्ह्याःगु आन्दोलनया झ्वलय् शहादत जूपिनिगु लुमन्तिइ बिहिवाः किपुलिइ थ्व शहिद दिवस हंगु खः ।

स्थानिय खाःसि बजारय् पलिस्था यानातःगु शहिदया झ्वाताय् शहिद छेँजःपिंलिसें सकलें राजनीतिक पार्टीया नेता कार्यकर्ता व सर्वसाधारणपिंसं नं शहिदया झ्वाताय् स्वां देछाःगु खः ।

स्वांमा क्वखायेका न्ह्याःगु र्‍याली किपू दे चाःहिउगु खः । र्‍यालीइ स्थानिय थीथी स्कूल, कलेजया विद्यार्थी नापं थीथी पार्टीया नेता कार्यकर्ता लिसें सर्वसाधारण ब्यक्तिपिनिसं ब्वति का:गु खः।

२०४६ चैत्र २० गते थौंया दिनस किपूया जनतां पञ्चायती व्यवस्थाया बिरोधय् खाःसि च्वंगु प्रहरी चौकि न्ह्य:ने आन्दोलन याःबलय् प्रशासनं गोलिं कयेकूगु खः । गोलिं लानां आन्दोलनकारीपिं लन बहादुर महर्जन, राजमान माली, हिराकाजी महर्जन व राजेन्द्र महर्जन शहिद जूगु खः।