प्रा.डा.के.सीं अनसन क्वचायेकल

त्रिवि व सरकारं सहमति मयाःगु धासें च्वंगु प्यक्वःगूगु अनसन शनिवाः क्वचायेकूगु दु । राज्यय् न्हूम्ह प्रधानमन्त्री नेपाली काँग्रेसया सभापति सुशिल कोइरालां सपथ कायेसातकि हे अनसनया बारे च्यूता तःसें याकनं हे थ्व अनसन दिकेबीकेत सम्बन्धित पक्षतय्त उजं ब्यूगु खः ।

निवाः तक अनसन च्वनेधुंकाः प्रधानमन्त्री व मन्त्रीपरिषद् ज्याकूया सचिव व सरकारी वार्ता टोलिया कजि कृष्णहरी बाँस्कोटां अनसन च्वनाच्वंम्हेसित वंगु माघ १० गते तिनि सरकारपाखें माग पूवंकेगु प्रतिवद्धता प्वंकूगु खः । तर व पूमवंकूगुलिं वंगु शनिवाः निसें हाकनं अनसन च्वनादीगु खः ।

प्रा.डा.के.सी.या माग कथं चिकित्साशास्त्र अध्ययन संस्थानय् न्हूम्ह डिनया रुपय् वरिष्ठताया आधारय् प्रा.डा. राकेशप्रसाद श्रीवास्तवयात नियुक्त याःगु खःसां नं उलिंजक थःगु माग पूमवं धासें अनसन मत्वःतूगु खः । लिपांगु पटक सरकार व चिकित्कतय् दथुइ त्रिवि पदाधिकारीपिंसं प्यंगू निजी मेडिकल कलेजयात सम्बन्धन बीत्यंगु बारे मालेकुले यायेत अख्तियारयात समेत उजं ब्यूगु व त्रिवि चिकित्साशास्त्र अध्ययन संस्थानयात स्वायत्त दयेकेत २१ न्हुया दुने त्रिवि सभा सःतेगु लिसें खुगू बुँदाय् सहमति जुसेंलि अनसन क्वचायेकूगु खः ।

मुख्यसचिव लीलामणि पौडेललिसें शिक्षा सचिव व चिकित्सक संघया नायः दुथाय् मेडिकल कलेजया विद्यार्थीपिंसं जुस त्वंकाः अनसन क्वचायेकूगु खः ।