पत्रकार दबूपाखें रुपा महर्जनयात हन

निक्वःगु सविधान सभाय् समानुपातिकं सभासद जुयादीम्ह नेवाः सन्देश वाःपौंया कार्यकारी सम्पादक रुपा महार्जनं नेवाः सरोकारया पक्षय् बांला सः संविधान सभाय् व संसदय् तय्फय्मा धैगु भिन्तुना सहित हनेज्या माघ १४ गते थँहिती याःगु दु ।

नेवाः पत्रकार राष्ट्रिय दबू यें कचाया ग्वसालय् न्ह्याकूगु उगु हनेज्याझ्वय् मूपाहांया थासं गोरखापत्र न्हिपौया प्रधान सम्पादक पुष्कर माथेंमां आः संविधान सभाय् संघीयता व पहिचान पक्षधरतय्सं थःगु पक्षय् सः क्वातुक ल्होनेमाःगु खँय् बः बिसें नेवाः सभासद जुया नेवाःतय्गु विषयलय् गुलि क्वातुक सः तल व तःधंगु खँ खः धयादिल ।
नेवाः पत्रकारतय्गु आपालं सहभागिताय् न्ह्याःगु थुगु ज्याभ्वलय् सभासद रुपा महर्जनं संविधान सभाय् ल्होनेमाःगु खँया बारे सुझाव बियादीत इनाप यानादिल । नापं वय्कलं झीसं झीगु सवालयात नेवाः भाषं जक धयामच्वसें थीथी भाषं नं झीगु खँयात व्यापकता बिइमाःगुलिइ बः बियादिल । कचाया नायो नातिकाजी महर्जनया सभापतित्वय् कचाया ल्यूछ्यान्जे रश्मि नापितं न्ह्याकूुगु उगु ज्याझ्वलय् ख्वप कचाया नायो केके मानन्धरं सभासद मय्जुं संघीयताया सवालय् गाक्कं तिवः बियादी धैगु आशा कया धासें झीसं वय्कःयात माःकथंया ग्वहालि याय्माः धकाः नं धयादिल । थुकथं याना वन धाःसा संविधान सभाय् माःकथंया खँ तय्त वय्कःयात गाक्कं तिवः जूवनिगुलिं उकथंया ज्या याना वनेत पहल याय्माःगुलिइ बः वियादिल ।

उगु ज्याझ्वलय् दबूया केन्दीय मूछ्यान्जे उदेन न्हूसाय्मिं नेवाःतय्गु सवालया पक्षय् जिमिसं सतकं सः ल्होनेगु खँ तसें सभासदजुं सदनं सः तयावन धाःसा सशक्त जुइगु नं जानकारी बियादिल । कचाया न्वकु रत्नकाजी महर्जनं. सुभाय् न्वचु बिसें संघीयता व पहिचानया मुद्धायात झीसं थीथी थासं क्वातुक ल्होनेमाःगु खँय् बःबिसें आः सभासद रुपा महर्जन थःगु थासं नेवाः मुद्धायात तिवः बिइ धैगु खँ कनादिल । कचाया छ्यान्जे प्रजित शाक्यं लसकुस न्वचु बिया न्ह्याःगु थुगु ज्याझ्वलय् राम बहादुर डंगोलं नं थःगु नुगः खँ तयादीगु खः ।

More Stories Like this

मेरिल्याण्डय् लाखय् व पुलुकिसिलिसे हन येँयाः
स्यस्यः समाजं सत्यमोहन जोशीयात हन
मूलयात ग्वाहालि लःल्हात
मेहेन्दी च्वयेगु कासा जुइगु
मचातयत मां भाय् स्यनेगु संस्था नीस्वन