निर्वाचनया निष्पक्षताय् ब्वलंगु न्ह्‍यस:

निर्वाचन स्वतन्त्र व निष्पक्ष रुपं जुल धका: प्रचारबाजी नं मा:गुसिकं आपा: हे जुल । तर थ्वहे इलय् पहिचान पक्षधरतय्‍त बुकेत सुनियोजित रुपं षडयन्त्र जूगु दु धइगु आभाष स्पष्टरुपं हे मनूतसें वा:चायेकाच्वंगु दु । चुनावया इलय् एनेकपा (माओवादी)लिसेंया दलतय् विरुद्ध व्यापकरुपं कुप्रचार जुल । थुपिं देय् कुचा थलीपिं, जातीय ल्वापु भड्‍के यायेत स्वइपिं, थीथी१२६ गू जाति दुगु देसय् एकल जातीय पहिचान फ्‍वनीपिं इत्यादि । नेपा:या मतदाताया मनस्थिति धइगु 'पृथ्वीनारायण शाहं नं नेपा: एकीकरण याना: विदेशीतपाखें नेपा:यात स्वतन्त्र तल' धइगु खँ निर्वाचनया निष्पक्षताय् ब्वलंगु न्ह्‍यस: हे ब्वना वयाच्वंपिं न्यनावयाच्वंपिं पंचायतीकालया शिक्षां ब्वलंकात:पिं प्रडक्टत ख: । थ्व स्थितिइ देय् कुचा थलीगु, जातीय दंगा भड्‍के याइगु, साम्प्रदायिक धइगु थुज्व:गु खँपुतसें बांलाक्क हे ज्या यात । थुलि जक मखु, दर्शन रौनियार धइम्ह छम्हस्यां प्रचण्डयात १७ द्व: मनू स्याना: छु दत धइगु न्ह्‍यस: नं छुत धा:सा वहे खँ नं उतिकं हे प्रचार नं जुल । बालकृष्ण ढुंगेल, अधिकारी दम्पत्तीया अनसन आदि इत्यादि चर्चा नं थ्वहे इलय् जुल । थ्व बाहेक गुलिखे थासय् विदेशंतकं ध्यबा लगानी जूगु खँ पिहां व:गु दु । ध्यबाया आपालं चलखेलं नं चुनाबी परिणामय्‍ लिच्व: लाकूगु खनेदत । न्हापां प्रचार अनंलि ध्यबा व वयांल्यू नं सुरक्षा घेराय् बाकस त:गु याना: मूलत: स्वंगू प्रकारं थुपालय् योजनाबद्ध पहलं संघीयता व पहिचान पक्षधरतय्‍त बुकेगु कुत: जूगु स्पष्ट खनेदुगु दु ।
थुकिं याना: निर्वाचनया निष्पक्षताया सवालय्‍ न्ह्‍यस: दनीगु स्वाभाविक खँ ख: । न्हापा जूसा आम सञ्चार माध्यमं निर्वाचन आयोगया सूचना व मतदान यायेमा: धइगु विज्ञापन जक प्रचार जुइगु थासय्‍ आ: चुनावी आकलन, पार्टीतय्‍गु विज्ञापन, चुनावी प्रचारप्रसार जुयाच्वंगु समाचार नं पिदन । थ्व गुलित पाय्‍छिगु खँ ख: ? थ्व दकलय् न्हापां न्ह्‍यस: छुइमा:गु खँ जूगु दु । मेगु खँ ध्यबाया चलखेलय् नं अनुसन्धान जुइमा:गु खनेदु । अनंलि मतपत्र व बाकसया सवालय् गन गुकथं खँ व:गु दु, उकी नं छानविन जुइमा:गु दु । आपालं मतदातात थुगुसी याउँक व सुबिस्ता साथ भोट कुत्के खंगुलिं धाँधली जूगु मदु धइगु बिचा: ज्वना हे च्वंगु दु । तर गुलिखे थासय्‍ मुचुल्कासिकं आपा: मत खनेदत धा:सा गुलिखे थासय् मुचुल्कासिकं म्हो मत खनेदत ।

थ्व सिकं ला राप्रपा नेता डा. प्रकाशचन्द्र लोहनीं गुगु रेकर्ड व लेख प्रकाशनय्‍ हया: सुरक्षा निकाययात तकं न्ह्‍यस: चिं छुत, उकिं ला निर्वाचन आयोगयात नं त:धंगु न्ह्‍यस: चिं छुत । एमाओवादी नेता नन्दकिशोर पासाङ्गं त:गु छगू उजुरीयात प्रमुख निर्वाचन आयुक्त नीलकण्ठ उप्रेतीं बांलाक्क सम्बोधन मयासें काइते पहलं किटानी रुपं थन बुथय् थथे जुल धका: मदुगुलिं छुं यायेम्वा:गु ठहर यात । थुकिं नं उप्रेतीया काइते पह:या ल्यूने छुं दु धका: सी दु । न्ह्‍याग्गुसां थुगु निर्वाचनय् निष्पक्षताय् गुगु न्ह्‍यस: चिं दन उकिं दीर्घकालीन रुपं असर लाइगु खनेदु ।

More Stories Like this

पहिचानसहितया संघियताय् नेतातय्गु ग्याचिकु
दरवार हत्याकाण्डय् ‘रअ’ मखु ‘सिआईए’ नाय: हँ
कोइराला सरकार न ख्येँय् चाल न हँय्या चाल
अधिवेशनं ब्यूगु सन्देश
न्यायाधिश जुइत ध्यवा नकेत वंगु न्यायपालिका न्ह्‍यस: