खुम्ह ब्वमिपिन्त छात्रवृति लःल्हात

मस्तय्गु पहुंच शिक्षाय् क्वातुल धाःसा जक भविष्यय् देय्यात गतिशीलरुपं न्ह्याकेफै धैगु खँयात आत्मसात् यानाः शिक्षायात महत्व बियाः आखः ब्वनेत आर्थिक पक्षं साथ मबियाच्वंपिं खुम्ह मस्तय्त छात्रवृति बिइगु ज्या बालसेवा मा.बिस सोमवाः मुंज्याय् जूगु दु ।

बालसेवा माबिया ४ म्ह व विजय स्मारकया २ म्ह यानाः मुक्कं खुम्हसित नेपाल परम्परागत बौद्ध धर्म संघ नेपालं कोरियाया ग्वाहालि कयाः छात्रवृति बिइगु ज्या याःगु खः ।

ब्वमिपिन्त छात्रवृति रिमा बज्राचार्य, जुजुरत्न बज्राचार्य, दिलिप शाक्य व रेणु शाक्यपिन्सं ब्वमि व अभिभावकपिनिगु उपस्थितिइ लःल्हाःगु खःसा ब्वमिपिंसं विद्यालयया प्रधानाध्यापक प्रफुल कमल ताम्राकारयात लःल्हाःगु खः ।

छम्ह ब्वमियात दच्छिया न्याद्धः तकाया ल्याखं छात्रवृति लःल्हाःगु खः । उगु बःचाधंगु ज्याझ्वस थःगु नुगःखँ तसें विद्यालयया प्रधानाध्यापक प्रफुल कमल ताम्राकारं दान, शील, भावनायात महत्व बियाः झीपिं न्ह्याय्माःगु खँय् बः बियादिल । वय्कलं थुकथंया ज्याझ्वलं आखः ब्वनेगु इच्छा दतं नं धेवाया हुनिं आखः ब्वनेगुपाखें बन्चित जुइत्यंपिं ब्वमिपिन्त तिवः जूवनिगु धारणा न्ह्योथनादीगु उगु ज्याझ्वस शिक्षक राम थापां नं थुकथंया ज्याझवः तसकं हे च्वछाय्वहः जूगु नुगः खँ कनादीगु खःसा छात्रवृति स्वंगू तगिंनिसें च्यागू तगिं तकया ब्वमिपिन्त लः ल्हाःगु खः । ज्याझ्वस धर्म याय् बलय् सुयात छु माःगु खः वयात हे प्रत्यक्षरुपं बिइगु याय्माःगु खँ वक्तापिन्सं प्वंकूगु दु ।

More Stories Like this

एसएलसी दसि पौ प्रमाणीकरण इन्टरनेटं
शिक्षक नियुक्तिया लँपु चाल
लक्ष्मीनारायण-पुनमाया सिरपाः लःल्हात
एसएलसीइ नेपालभाषा कयाः ब्वंपिंत हन
एसएलसीइ बच्छि मल्याक फेल