प्रचण्ड सरकार निर्माणया ठेकेदार खः ला ?

येँ (झीगु स्वनिगः)

न्यागू बुँदाया सहमति कथं संविधान निर्माणया विषययात कयाः सहमति जुल धाःसा जक कांग्रेसया नेतृत्वया सरकारयात स्वीकार यायेफै मखुसा स्वीकार यायेफैमखु धकाः एकीकृत माओवादीया नायः पुष्पकमल दाहाल प्रचण्डं न्वंवानादीवं हे कांग्रेसया नेतात हीमी चायाः आक्रमक रुपं प्रस्तूत जुयादीगु दु ।

नेकपा—माओवादीं वंगु शनिवाः ग्वसाःग्वःगु बृहत्त गोलमेच सभाय् संघीयताया सवालय् कांग्रेस एमाले पहिचानयात स्वीकार यायेत सहमति जुइ हे माः धकाः न्ह्यथसें अथे न्वंवानादीवं हे कांग्रेसया नेतात प्रचण्डप्रति आक्रमक जुयावःगु खः । कांग्रेसया सभापति सुशील कोइरालां ला सरकार दयेकेगु सवालय् प्रचण्ड ठेकेदार खःला धकाः तकं न्ह्यसः तयादीगु दु । म्हिगः आइतवाः चितवनय् जूगु छगू ज्याझ्वलय् न्वंवासें कोइरालां ‘प्रचण्ड सरकार दयेकेगु नितिं ठेकेदार खः ला अथे खँ ल्हायेत ?’ धकाः न्ह्यसः तकं तयादिल । तःक्वःमछि हे प्रचण्डं झंगः लायेगु ज्या यानाच्वंगु नापं आः ल्वाभः ज्वनाः वा धकाः तकं धाये धुनागु दु धकाः न्ह्यथसें धयादिल‘ आः छिकपिं बन्दुक ज्वनाः ल्वायेत वा । जितः नं स्याना छ्व ।’

प्रचण्डप्रति तसकं आक्रमक जुयाः नेता कोइरालां अथे न्वंवानादीगु खः ।
कांग्रेसया नेतातय्सं आःया अवस्थाय् हे थःपिनिगु नेतृत्वय् सरकार गठन जुइगु जुल धकाः तायेकाच्वंगु खःसा उकियात कयाः स्वीकार यायेफैमखु धकाः प्रचण्डं न्वंवानादीवं हे आः वयाः एकीकृत माओवादी व नेपाली कांग्रेसया दथुइ स्वापू झन झन स्यनाः वनीगु अवस्था वल धकाः तकं मनूतय्सं टिप्पणी यानाहःगु दु ।