युवा विद्यार्थीतपाखें थप आन्दोलनया घोषणा

येँ (झीगु स्वनिगः)

नेपाली कांग्रेस, एमाले लगायत विपक्षी गठबन्धनय् सहभागी राजनीतिक दल लिक्क लाःगु १७ युवा विद्यार्थीतय्सं आन्दोलनयात थप ज्याझ्वः घोषणा याःगु दु ।
अथे युवा विद्यार्थीतय्सं संयुक्त मोर्चा निर्माण यानाः प्रधानमन्त्री डा. बाबुराम भट्टराई पदमुक्त मजूतले निरन्तर रुपं आन्दोलन यायेगु जुइ धकाः म्हिगः पत्रकार सम्मेलन यानाः जानकारी ब्यूगु दु ।

उगु कथंया विपक्षी दलया युवा विद्यार्थीतय्गु गठबन्धनं थौं आइतवाः सरकारं हनेत्यंगु युवा दिवस असफल यायेत पंगः थनेगु, विदेशी नां व विदेशी शैक्षिक संस्थाय् आबद्धता दुगु सिटीभीटी अन्तर्गतया फुक्क शिक्षण संस्था बन्द यायेगु धकाः नं घोषणा याःगु दु । अथे हे कन्हय् साउन २७ गते सोमवाः ७५ जिल्लाय् प्रधानमन्त्रीया ख्वाःपाः नापं ध्याचू जुलुस पिकायेगु, ३० गते कंस येँय् स्वरोजगार कोष घेराउ यायेगु व ७५ जिल्लाय् जिल्ला प्रशासन ज्याकू घेराउ यायेगु, साउन ३१ गते सरकारया बैधताया विषययात कयाः मतदानया प्रचार प्रसार यायेगु, साउन ३२ गते सरकारया बैधतायात कयाः देय्न्यंकं मतदान यायेगु, भदौ १ गते मतदानया नतिजा घोषणा यायेगु व भदौ ३ गते राष्ट्रपतियात उगु मतदानया परिणाम लःल्हायेगु नापं उखुन्हुंनिसें हे प्रधानमन्त्री निवास घेराउ यायेगु घोषणा याःगु दु ।

अथे हे उगु ई तकया दुने नं थःपिनिगु माग पूरा मजुल धाःसा अनंलिपा अझ थप सशक्त कथंया आन्दोलन यायेगु धकाः नं इमिसं घोषणा याःगु दु । आन्दोलनयात बलं हे प्रधानमन्त्री डा. बाबुराम भट्टराईयात पदमुक्त यानाः हे त्वःतेगु जुइ धकाः तकं इमिसं ख्याच्वः ब्यूगु दु ।