दलया शीर्ष नेतातय्तय्गु उपस्थितिइ वइगु आइतवाः

राष्ट्रपतिया नेतृत्वय् ‘गोलमेच सम्मेलन’

येँ (झीगु स्वनिगः)

राष्ट्रपति डा. रामबरण यादवं वइगु कंस आइतवाः प्रमुख दलया शीर्ष नेतातय्त सःताः थःगु हे नेतृत्वय् छगू कथं ‘सर्वदलिय गोलमेच सम्मेलन’ याइगु जूगु दु ।
सूत्रं ब्यूगु जानकारी कथं आःया अवस्थाय् राजनीतिक दलतय्गु दथुइ सहमति याये मफयाच्वंगु नापं निकासया नितिं थःम्हं हे कुतः यायेमाःगु अवस्था वःगुलिं राष्ट्रपतिं अथे मंकाः कथं मुँज्या सःतादीगु खः । अथे मंकाः मुँज्या सःतादीगुयात हे राजनीतिक विश्लेषकतय्सं व छगू कथं ‘राष्ट्रपतिया नेतृत्वय् गोलमेच सम्मेलन’ खः धकाः टिप्पणी यानाहःगु दु ।

वर्तमान कामचलाउ सरकारं सःतीगु सर्वदलीय मुँज्यायात कांग्रेस एमाले लगायतया दलतय्सं बहिस्कार याइगु अले दलतय्गु दथुइ नं मूल रुपं संघीयताया सवालयात कयाः सहमति जुइ मफैगु अवस्था वःगुलिं उगु कथं राष्ट्रपतिं मंकाः मुँज्या सःतादीगु खयेमाः धकाः अःपुक अनुमान यानाहःगु दु । उगु मुँज्याय् एकीकृत नेकपा (माओवादी), नेपाली कांग्रेस, नेकपा (एमाले), नेकपा—माओवादी, मधेसी मोर्चा, राष्ट्रिय प्रजातन्त्र पार्टी, राष्ट्रिय जनशक्ति पार्टी लगायतया राजनीतिक दलया शीर्ष नेतातय्त अथे राष्ट्रपतिं मुँज्या सःतादीगु खः धकाः सूत्रं धाःगु दु ।

नेपाली कांग्रेस, एमाले लगायतया दलतय्सं राष्ट्रपतियात सक्रिय जुयाः वर्तमान सरकारयात विघटन यायेमाः धकाः तकं इनाप यायेगु नापं फयां फत्तले राष्ट्रपतियात हे न्ह्यःने यंकेगु कुतः यानाच्वंगु अवस्थाय् अथे दलया शीर्ष नेतातय्त राष्ट्रपति यादवं सःतादीगु मुँज्या मुलुकयात राजनीतिक निकासया नितिं बांलाःगु पक्ष खःसां नं गनं राष्ट्रपति सक्रिय जुयाः वइगु लक्ष्यण नं जुइफु धकाः मनूतय्सं टिप्पणी यानाहःगु दु ।
वर्तमान कामचलाउ सरकारं मंसीर ७ गते संविधानसभाया चुनाव यायेगु धकाः घोषणा याःगुयात आः वयाः निर्वाचन आयोगं उगु इलय् संविधान व कानुनया ल्याखं याये फैगु अवस्था मन्त धकाः घोषणा यायेवं नेपाःया राजनीतिइ न्हूगु कथं अभ्यास सुरु जुइत्यंगु खः धकाः तकं धयाहःगु दु ।

यदि राष्ट्रपतिं हे दलतय्त मिलेयायेगु ज्या यात धाःसा अथवा दलतय्गु धापू न्यनाः राष्ट्रपतिं थःगु हे कथंया योजना दयेकाः पलाः ल्ह्वन धाःसा कन्हय् नेपाःया राजनीति गुखेपाखे वनीगु खः व धाये फैगु अवस्था मदु धकाः नं अनुमान यानाहःगु दु ।
संविधानसभा मदये धुंकूगु अले राजनीतिक दलया नेतात मूल रुपं संविधान निर्माणसिबें नं मेथाय् हे ध्यान केन्द्रीत यानाः वनाच्वंगु थ्व अवस्थाय् दलया नेतातय्सं छु गज्वःगु भूमिका म्हिताः न्ह्याः वनीगु खः व धाःसा कन्हय्या दिनय् अवश्य नं सीदइ ।