छोरीमैंया मालेत हाकूगु ब्यानर तइगु

येँ (झीगु स्वनिगः)

फागुन महिनांनिसें बेपत्ता जुयाच्वंम्ह येँया छोरीमैंया महर्जनयात मालेमाःगु माग यानाः येँया त्वाः त्वालय् हाकूगु ब्यानर तइगु जूगु दु । छोरीमैंया खोजी दबाव समूहया ग्वसालय् म्हिगः शनिवाः येँय् जूगु छगू भेलां अथे निर्णय याःगु खः । छन्हु निन्हुया दुने हे येँया ६३ त्वाः व थीथी खलः पुचःपाखें अथे हाकूगु ब्यानर तयाः राज्ययात दबाव बिइगु जूगु दु । उगु भेलां वइगु साउन २२ गते सोमवाः १० बजे येँया बसन्तपुरय् मुनाः जुलुस यानाः प्रधानमन्त्रीयाथाय् वनाः ल्हाःचिं लल्हायेगु नाप नापं स्वन्हुया अल्टिमेटम बिइगु जूगु दु ।

बेपत्ता जुयाच्वंम्ह छोरीमैंयातयात सार्वजनिक यायेमाःगु माग यानाः ल्हाःचिं मुंकातःगु खःसा उगु ल्हाःचिं हे प्रधानमन्त्रीयात लःल्हाये त्यंगु खः । अथे स्वन्हुया अल्टिमेटम बियाः नं मागयात सम्वोधन मयात धाःसा सशक्त संघर्ष यायेगु जुइ धाःगु दु । उकिया नितिं साउन २६ गते न्हूसतकय् सभा यायेगु अले उगु हे सभां आन्दोलनया ज्याझ्वः घोषणा यायेगु धाःगु दु ।