नेवाः व जनजातितय्गु थःथःगु कथंया तयारी

येँ (झीगु स्वनिगः)

नेवाः देय् गुथि नेपाल मण्डलं थौं आदिवासी जनजाति नेतातलिसे थौं विहिवाः सहलह ब्याकीगु जूगुदु । आःया राजनीतिक अवस्थालिसें आदिवासी जनजाति नेताय्सं ल्ह्वनेमाःगु पलाःया बारे अन्तक्र्रिया यायेगु जुइ धकाः ग्वसाः खलकं धाःगु दु ।
येँया नेपाल आदर्श मावि गणबहालय् न्हिनय् निताः इलंनिसें अथे सहलह ब्याकेत्यंगु खः । अन्तत्र्रिmया ज्याझ्वलय् एमालेया नेता राजेन्द्र श्रेष्ठ, जनजाति महासंघया मूछ्याञ्जे आङकाजी शेर्पा नापं मेमेपिं नेतातय्सं ब्वति कयादी धाःगु दु ।
उगु ज्याझ्वलय् एमाले दुने आदिवासी जनजातितय्सं यानाच्वंगु संघर्ष नापं आदिवासी जनजातिय्गु ब्यागलं कथंया दल चायेकेगु धकाः तयारी यानाच्वंगु बारे नं सहलह जुइ धाःगु दु ।

थ्व हे दथुइ नेवाः स्वायत्त राज्य मंकाः संघर्ष समितिइ न्हूगु ज्याझ्वःया बारे थौं शुक्रवाः सहलह ब्याकीगु जूगु दु । आःया अवस्थाय् संविधानसभां हे न्हूगु संविधान जारी यायेमाःगु, उकिया नितिं संविधानसभा पुनस्र्थापना अथवा संविधान सभाया चुनाव यानाः जूसां संविधान जारी याकेगु नितिं माःगु कथं दबाव बिइत तयारी धकाः नीतिगत रुपं निर्णय याये धुंकाः संघर्षया ज्याझ्वः तयार यायेत छुं दिं न्ह्यःनिसें लगातार आन्तरिक तयारी यानाः वयाच्वंगु खः ।

थ्व हे दथुइ आदिवासी जनजातिय्सं वइगु विश्व आदिवासी दिवस अगष्ट ९ खुन्हु न्हूगु राजनीतिक दल घोषणा याइगु जूगु दु । आःया नितिं छगू तदर्थ समिति जक जूसां घोषणा यायेगु नापं लिपा महाधिवेशन यानाः उकियात पूर्णता बिइगु ज्या जुइ धकाः जनजातिया नेतातय्सं धयादीगु दु ।

छुं दिं न्ह्यः जक आदिवासी जनजातिय्गु राष्ट्रिय राजनीतिक सम्मेलनं म्याण्डेत ब्यूगु कथं अथे आदिवासी जनजाति नापं राज्यं बहिस्करणय् लाकातःपिनिगु हक अधिकारया नितिं राजनीतिक दल चायेकेत जनस्तरय् वनाः परामर्श यायेगु नितिं छगू कार्यदल दयेकूगु खः । उगु कार्यदलं स्वनिगलंपिने थीथी जिल्लाय् वनाः परामर्श यानाः वःगु खःसा उगु परामर्शया आधारय् हे विश्व आदिवासी दिवसया दिनय् लाकाः न्हूगु पार्टी घोषणा यायेगु तयारी जुयाच्वंगु खः धकाः नं जानकारी ब्यूगु दु ।