प्रचण्ड वःसा लसकुस यायेगु नेता विप्लबया धापू

येँ (झीगु स्वनिगः)

नेकपा—माओवादीया छ्याञ्जे नापं जनस्वयंसेवकया इन्चार्ज नेत्रविक्रम चन्द विप्लबं आत्मसमपर्णवाद त्वःताः एकीकृत माओवादीया नायः प्रचण्ड नापं वनेत वल धाःसा लसकुस यायेगु जुइ धकाः धयादीगु दु । वय्कलं धयादिल ‘छुं पक्ष प्रचण्ड जिपिंलिसे मिले जूवल धाःसा लसकुस यायेगु जुइ ।’

जनस्वयंसेवक केन्द्रया निक्वःगु पूर्ण मुँज्या लिपा म्हिगः बुधवाः भरतपुरय् छगू पत्रकार सम्मेलनया झ्वलय् वय्कलं एकीकृत माओवादीइ दुगु आत्मसमर्पणवादी प्रवृत्तिया कारणं हे थःपिं ब्यागलं च्वनागु खः धकाः धयादिल  ।

प्रचण्ड व बाबुराम राष्ट्रघाती जूल धयादिसें आःया सरकार सहमतिया मखु धकाः नं धयादिसें नेता विप्लबं संविधानसभाया चुनाव व पुनस्र्थापना निगुलिं पाय्छि मजू धयादिल  । निकासया नितिं गोलमेच सभा यायेमाः धकाः नं वय्कलं धयादिल ।